A franqueza, o exame de conciencia e análise da lanzadora galega Belén Toimil fala da súa honestidade, ante si mesma, e ante quen segue a súa traxectoria e ten depositadas nela moitas das grandes esperanzas do lanzamento de peso non so galego e español. Unha vez máis, preséntase como unha gran deportista dentro e fóra do ámbito competitivo.
A mugardesa Belén Toimil foi décima e primeira española clasificada nesta competición de ámbito europeo disputada na localidade de Split, en Croacia. Pero a súa marca, 16,53 metros, estivo moi lonxe dos lanzamentos aos que a galega do Playas de Castellón nos ten acostumadas nas súas últimas competicións. No Campionato de Europa, a atleta de Mugardos, lanzou até os 18.01, conseguindo a súa segunda mellor marca do ano e remata ba a competición na sétima praza. Este mesmo ano tamén en marzo no Europeo, batía o récord de España de lanzamento de peso cunha marca de 18.64.
Sobre o seu concurso na Copa de Europa de Lanzamentos Belén Toimil publicaba na súa conta de Instagram unha autocrítica, construtiva pero chea de franqueza. A atleta galega empezaba decindo: “Hai xeitos de liala nunha competición, pero a proba de onte pode que teña estado no meu top tres de peores competicións”.
A lanzadora de peso de Mugardos continuaba explicando que poñía “a situación en contexto” sabía “que nas datas nas que estamos, a miña planificación de adestramento non contempla estar fina para competir, xa que hai unha data específica como obxectivo”, apuntaba en clara referencia aos Xogos Olímpicos de Toquio para os que está clasificada.
Ver esta publicación en Instagram
Con todo, e pese a ese contexto do que falaba a atleta española, “o de onte non ten xustificación”, aseguraba. “Incluso sen estar en período competitivo sei que podo lanzar moito máis do que onte demostrei no círculo”, lamentaba a deportista.
Belén Toimil: “Toca analizar, corrixir e mellorar”
Como exame de conciencia, a deportista galega sinalaba que a “preparación é un proceso longo e ten altibaixos. Toca analizar, corrixir e mellorar. Agardo sentirme mellor na seguinte competición”, manifestaba.
Como colofón en positivo do seu paso pola Copa de Europa de Lanzamentos de Split, Belén dicía quedarse coa “experiencia e co incrible escenario no que puidemos lanzar: as ruínas dun anfiteatro romano!”. Efectivamente, o entorno da competición era tan atípico como espectacular.
Belén Toimil finaliza décima na Copa de Europa de Lanzamentos
