O estado de forma de Belén Toimil fai que a galega mellore marca semana case tras semana. Nesta ocasión venceu co Playas de Castellón na súa disciplina, lanzamento de peso, e tamén por equipos dentro do concurso do Campionato de España de Clubs Feminino “Copa Iberdrola” en Pista Cuberta. Os 17,86m que acadou deixáronna a so 8 centímetros do récord de España que aínda ostenta Martina de La Puente Piñera (17.94 en 1996). Soli Pereira foi terceira na remuda 4×400 e cuarta en solitario nos 800 m. defendendo as cores do Valencia Club de Atletismo
A galega Belén Toimil está nun estado de forma espectacular. Este sábado o Palau Sant Jordi de Barcelona, que acollía o Campionato España Clubs Feminino “Copa Iberdrola” Pista Cuberta, foi o escenario para a súa nova proeza. So oito centímetros a separaron do récord de España na súa disciplina. Houbo que agardar á súa quinta tentativa pero nela Belén soltou o brazo de tal xeito que lanzou até os 17,86 m. Iso colocaa como posuidora da oitava europea do ano neste momento.
A ledicia da atleta galega non se podía agachar ao final da competición. Belén Toimil declaraba ante os micrófonos da RFEA que estaba “moi contenta por ver que xa van saíndo as cousas do traballo. Dame moita motivación para seguir tentando rascar centímetros. Os 18 están aí e quero tentalo”.
A galega Belén Toimil, gañadora no lanzamento de peso: “Dame moita motivación para seguir tentando rascar centímetros. Os 18 están aí e quero tentalo”.
“A nivel persoal moi contenta, empecei a competición un pouco ao tran-tran, pero logo remontei. Iso é o bo, que tes varios intentos. En comparación coas outras competicións anteriores pegueille aí unha dentadiña, pero e que eu teño en mente agora mesmo moito máis e, a verdade, ogallá saia”, apuntaba a galega que deixaba ver que ten as súas miras postas en ser quen de lanzar os 18 m.
Actualmente a mínima europea está en 18.20, algo que co nivel de forma que está a amosar Toimil podería estar ao seu alcance nesta tempada.
Alguien está feliss, feliss, feliss 😁@belentoimil tras lograr la SEGUNDA MEJOR MARCA 🇪🇸 de la historia (17.86) 💥 #CopaIberdrola #CEclubesPC pic.twitter.com/fxZ4O4QWYn
— atletismoRFEA (@atletismoRFEA) February 6, 2021
Con ledicia Belén Toimil admitía que non sabía que fixera unha marca de récord no campionato. “O récord de campionato, nin o sabía. Todo faime moita ilusión. Puiden darlle os puntos ao club. Moi contenta de poder aportar. Moi contenta en xeral”, dicía entre risas a atleta do Playas de Castellón.
Soli Pereira, terceira nos 4×400 e cuarta nos 800m
A representación galega neste Campionato de España feminino de clubs contaba tamén coa corredora Solange Soli Pereira. Coas súas compañeras do do Valencia Club Atletismo conseguíu finalizar en terceira posición na remuda 4×400 cun tempo de 3:43.78.
A galega correu en terceira posición nas postas. O equipo do Valencia Club Atletismo estaba conformado por: Carmen Sanchez Silva, Elena Moreno Huerta, Solange Andreia Pereira Da Ponte e Laura Bueno Fernández que pechaba a remuda dos 4×400 do equipo valenciá.
O triunfo foi para o FC Barcelona, seguido do Playas de Castellón. O récord do campionato está nos 2:04.08 Esther Desviat Ponce, mentres que o récord de España o ostenta María Teresa Martínez Jiménez cunha marca de 1:59.52.
De maneira individual, Solange Pereira remataba en cuarta praza a carreira de 800 metros asinando un tempo de 2:14.23. O triunfo foi para Agueda Muñoz Marques, do F.C. Barcelona que cubría a distancia en 2:13.37, segunda foi Daniela García do Playas de Castellón e terceira Lorena Ibarzabal do At. San Sebastián.
O Playas de Castellón, campión da “Copa Iberdrola” de Clubs
Toimil milita no C.A. Playas de Castellón que revalidou o título no Campionato España Clubs Feminino “Copa Iberdrola” Pista Cuberta nesta edición no Palau Sant Jordi de Barcelona. Segundo explica a RFEA “o equipo castellonenco retivo o título que logrou o pasado ano sumando un total de 67 puntos, cinco por diante do F.C.Barcelona, segundo con 62 puntos e completando podio a Valencia Club Atletismo, terceiro con 55 puntos”.
A vitoria das levantinas foi posible principalmente grazas “ás vitorias de Patricia Sarrapio en triplo, a ecuatoriana Yuliana Elizabeth Angulo en lonxitude, a ugandesa Winnie Nanyondo en 1.500m e María Belén Toimil en peso ademais da regularidade do resto de compoñentes”, explica a Real Federación Española de Atletismo.
A mañá na instalación barcelonesa, que veintiseis anos despois abriu as súas portas ao atletismo, deixou dúas marcas moi destacadas que ademais significan nova marca do campionato: primeiramente a pertiguista madrileña Andrea San Jose (Grupompleo Pamplona At.), actual campioa de España ao aire libre, elevouse por encima de 4.42 que a coloca líder española do ano e cuarta mellor marca española de sempre e que valente ela tentou en balde superar o 4.51. A outra gran marca veu da man da galega Belén Toimil co fabuloso lanzamento de 17.86m do que falamos previamente.
O resto de gañadoras da competición foron: María Isabel Pérez en 60m (7.40), a chipirota Olivia Fotopoulou en 200m (23.81), a lituana Modesta Juste Morauskaite en 400m (53.49), Águeda Muñoz en 800m (2:13.37), a ugandesa Winiie Nanyondo en 800m (4:17.36), Carolina Carballos en 3.000m (9:09.32), Caridad Jerez en 60m valos (8.36), Izaskun Turrillas en altura (1.80), a ecuatoriana Yuliana Elizabeth Angulo en lonxitude e MVA da competición (6.46), Patricia Sarrapio en triplo (13.50) (16 anos consecutivos superando esta barreira en pista cuberta) e finalmente o F.C. Barcelona na substitución 4x400m.
Equipo de prevención contra a COVID-19
Tal e como informa a RFEA neste evento, como aconteceu xa nas competicións previas de atletismo do calendario da federación “no que o primordial é a protección da saúde de todas as persoas presentes na instalación, contou con estritas medidas sanitarias e de prevención contra o COVID-19.
A competición desenvolveuse sen asistencia de público e só accederon as persoas previamente acreditadas, que deberon pasar un test de detección de antígenos do COVID-19″.
Explica tameán a RFEA que os seus Servizos Médicos “encargáronse da realización das probas. Os resultados se comunicaronde maneira individualizada na propia instalación nun prazo aproximado de 15 minutos tras a toma de mostra e o resultado negativo permitó a recollida da acreditación”.
“O uso de máscaras, obrigatorias en toda a instalación, os protocolos de limpeza, desinfección e hixiene en espazos e material de competición, a toma de temperatura nos accesos e a distancia de seguridade mínima de 1,5 m en todo o centro foron algunhas das medidas que levaron a cabo. Así mesmo, houbo un “Equipo protección COVID-19”, cuxa misión será velar polo cumprimento do protocolo AntiCOVID.
CAMPIONATO DE ESPAÑA DE CLUBS – COPA IBERDROLA 2021 EN PISTA CUBERTA
