Beatriz Seijas é a nova seleccionadora galega alevín feminina de fútbol sala. A galega sustitúe a Pili Costa no cargo, que non pode continuar por motivos persoais. Bea toma o mando tras anunciar a súa retirada das pistas o ano pasado. O adeus foi o soñado, vestindo a camiseta dos seus amores, a do Ourense Envialia, e recibindo o agarimo unánime do fútbol sala nacional.
A xogadora colgaba as botas con 28 tempadas disputadas ás súas costas, 14 no equipo ourensán. Levaba 21 anos dando notoriedade ao fútbol sala feminino e 36 practicando un deporte do que xa é historia, pero ao que segue facendo grande. A ferrolá, que empezou no fútbol sala como unha casualidade e que acabou sendo parte do seu ADN, ponse agora ao servizo da nosa canteira, da Selección Galega.
A carta de presentación
O currículo de Bea Seijas fala por si só. Unha lenda do fútbol sala feminino español que agora se pon ao servizo da canteira galega e que terá o reto de guiar á nosa selección alevín. Bea tamén foi a capitá da Selección Galega Feminina Absoluta que no 2017 disputou un encontro amigable ante Cataluña en Santiago de Compostela.
Cómpre salientar, ademais, que a RFGF concedeu a Bea Seijas a Medalla de Prata ao Mértito Deportivo da devandita institución na Gala do 2019.
- 27 campañas na Primeira División
- 40 veces internacional con España
- Marcou o primeiro gol da Selección Española Absoluta e tivo a honra de poñer en movemento o primeiro balón na historia da Selección Española
- 5 títulos de campioa de España de Seleccións Territoriais con Galicia
- 5 títulos de Liga de Primeira División con tres equipos diferentes
- 6 Copas da Raíña
- 4 Supercopas de España
- 4 Copas Ibéricas
- 5 títulos de Copa Xunta de Galicia
- 1 ascenso a Primeira División
- Nomeada mellor xogadora de España en dúas ocasións
“Espero poder axudar ás nenas a facer máis grande este deporte”
A nova seleccionadora galega alevín asume o cargo con toda a ilusión do mundo. Admite estar “feliz” e un dos seus retos pasa por transmitir o seu legado ás máis novas. “Afronto isto con moita ilusión. Estou moi agradecida á Real Federación Galega de Fútbol por acordarse de min. Empezo unha nova etapa como adestradora e darme esta oportunidade é moi ilusionante. Sei que teño moita responsabilidade sexa a categoría que sexa. Espero poder axudar ás nenas para continuar facendo máis grande este deporte”.
Bea Seijas, seleccionadora galega alevín feminina: “Empezo unha nova etapa como adestradora e darme esta oportunidade é moi ilusionante. Sei que teño moita responsabilidade sexa a categoría que sexa”.
Como adestradora non será a súa primeira experiencia, debido a que na actualidade forma parte do corpo técnico do primeiro equipo do Ourense Envialia. “Estou a formar parte do corpo técnico do primeiro equipo do Ourense Envialia. Agora tocará compatibilizar iso, a selección e a miña vida laboral. Estou encantada porque desde o primeiro momento quería asumir este reto”.
