Afeitas a falar con Bea Seijas de fútbol sala, desta volta conversamos con ela sobre outra das súas facetas: a de deseñadora gráfica no seu estudio, Bea Seijas Diseño. Explicounos o significado que hai detrás de esa flor de toxo que preside o novo escudo do Ourense OnTime FSF que ela vén de redeseñar.
Seus son os deseños das campañas que nos últimos anos fixeron do Ourense OnTime FSF fun referente da transmisión de valores a través dos seus lemas e camisetas. Un exemplo foi aquel: “A forza do lobo está na manda”.
Nesta ocasión, o encargo do club foi darlle unha volta, rediseñar, o elemento máis importante da entidade como marca: o seu escudo. A flor de toxo ten un protagonismo esencial nesta proposta gráfica na que tamén se suman outros elementos como a ponte romana, os ríos, as augas termais, ou bandeira galega. Velaquí o resultado:
S.C: Como foi o proceso creativo do rebranding do escudo do Ourense OnTime?
BEA SEIJAS: O proceso creativo de calquera rebranding ou de calquera traballo pasa primeiro por falar co cliente e tentar captar o que o cliente quere transmitir, neste caso cun escudo dun club. Os escudos levar implícita a esencia do que o cliente quere mostrar co seu logo, ten que ter personalidade e ten que indicar, cando a xente o vexa, que valores, esencia ou características ten esa empresa ou este club, neste caso.
Ese proceso, neste caso concreto, comigo, é un pouco máis sinxelo, porque ata hai nada eu formaba parte moi activa do club. A nivel deportivo levaba 20 anos nese club. Creeino xunto con outras persoas e, evidentemente, teño moi interiorizada a súa esencia, o que ese club quere transmitir, cales son os seus valores e todo máis doado.
Bea Seijas: “Incorporar a flor de toxo pareceume fantástico”
O proceso fíxeno ademais con Marta Figueiredo, que é a capitá do primeiro equipo e, despois de min, a persoa que máis tempo leva no club. Leva no Ourense OnTime FSF 19 anos e, como eu, ten clarísimo que é este club, que quere mostrar, e cal é a súa esencia.
O traballo estaba xa moi adiantado, debido ás características do cliente e de quen son eu. Foi todo moito máis doado e ademais Marta, é a miña amiga, é unha persoa vinculada tamén ás artes. Ten unha sensibilidade especial e todo fluíu dun xeito máis sinxelo.
Bea Seijas: “O proceso fíxeno ademais con Marta Figueiredo, que é a capitá do primeiro equipo e, despois de min, a persoa que máis tempo leva no club. Leva no Ourense OnTime FSF 19 anos e, como eu, ten clarísimo que é este club, que quere mostrar, e cal é a súa esencia”
Ela quería incorporar a flor de toxo, comentoumo e pareceume fantástico. É unha flor que indica o que o club ten interiorizado, que é esa loita feminista e a flor de toxo represéntao dun modo fantástico. É a resiliencia do toxo, que crece en calquera terreo, en calquera condición, e esas espiñas e esa dureza do toxo que resiste todo.
É un pouco a resiliencia da muller, unida á sensibilidade da flor de toxo. Que tamén é unha característica da muller. Mestúranse esas dúas cousas. Encaixa á perfección co que o club pretende mostrar.
Bea Seijas: “A flor do toxo indica o que o club ten interiorizado, que é esa loita feminista e a flor de toxo represéntao dun modo fantástico. É a resiliencia do toxo, que crece en calquera terreo, en calquera condición, e esas espiñas e esa dureza do toxo que resiste todo”
Había que ver como se encaixaba iso coas cores que tiñan que ser o azul e tamén coas referencias a Galicia e á cidade de Ourense. Fomos intercambiando ideas e, como en todo proceso, fomos evolucionando, ata chegar ao que todos queriamos de tal modo que todas esas cousas puidesen ser integradas no escudo.
Tiñamos claro que queriamos que fose redondo, limpo, moderno, con liñas claras e cores uniformes, planos…. Creo que se plasmou á perfección.
Como se pode ver é redondo, coas cores azuis como protagonistas, pero a flor de toxo é o elemento principal e central, vai no centro do escudo, encima de todos os demais elementos.
Integramos a bandeira galega, a ponte, que é un elemento do club de toda a vida que non queriamos que desaparecese, porque ademais é moi característico da nosa cidade, as augas termais e os ríos que van ao pé da ponte.
Bea Seijas: “Integramos tamén a bandeira galega, a ponte, que é un elemento do club de toda a vida que non queriamos que desaparecese, porque ademais é moi característico da nosa cidade, as augas termais e os ríos que van ao pé da ponte”
Creo que conseguimos integrar todos os elementos que queriamos e darlle a esencia fundamental.
Xa che digo foi todo moi fácil porque eu xa tiña moi claro todas as cousas e con Marta foi moi sinxelo porque xa tamén o ten clarísimo. Coñéceme, coñézoa, sabe como dicirme as cousas, entendémonos á perfección e conseguín darlle a esencia e a idea que se quería captar.
S.C.: Cada elemento ten un significado e un motivo podes darnos esas claves?
BEA SEIJAS: Tiñamos claro que queriamos que fose un escudo redondo porque cremos que visualmente queda mellor como todo iso. Cando todos dicimos, “quedou redondo”, a frase resume a perfección que nós queriamos co escudo. Algo moderno, compacto, visualmente, con harmonía, suave, elegante… Cremos que un escudo redondo reúne todas esas características.
En canto aos elementos había que integrar o nome, a cidade, a comunidade e o elemento principal, que é a flor de toxo.
Quixémolo facer con varios círculos concéntricos. A cor principal é o azul, pero ten toques (á parte da flor) ten un toque amarelo, dese círculo que vai por fóra do azul.
Partimos dun fondo branco, esa liña circular amarela por fóra para facer referencia á flor de toxo. Está o círculo azul principal e logo os tonos azuis da auga, que é un elemento característico da cidade de Ourense, xuntou coa ponte. Ao pé da ponte van esas ondas que queren facer referencia tanto aos ríos como ás augas termais da cidade, por iso van dúas ondas en dous tons de azul. A ponte é un elemento principal do noso club e da cidade, ten unha situación bastante céntrica para dar esa importancia.
O toque da bandeira galega, que vai por dentro no escudo (no círculo central) é para facer referencia á nosa comunidade.
E, por encima de todo iso, no sitio principal, está a flor de toxo. É a novidade e o que queremos resaltar sobre os demais elementos.
Logo integramos o nome en branco no círculo principal azul. Creo que conseguimos integrar todos os elementos dunha maneira visualmente boa, e que conseguimos captar a esencia de todos eles: ponte, augas termais, río, Galicia e flor de toxo, coas cores principais que son o azul e o amarelo que queremos dar a importancia polo tema da flor.
Ver esta publicación en Instagram
S.C.: Ti que desempeñaches diferentes papeis o en club e que levas tantos anos vinculada á entidade con cal dos elementos veste máis representada?
BEA SEIJAS: Levo moitos anos vinculada á entidade, como dis, fixen todos os papeis case posibles que se podía facer. Por tanto, o da flor de toxo encáixame a perfección. Tanto eu como outras compañeiras miñas da miña idade tivemos que ser moi, moi resilientes como o toxo, pero tamén temos, ou eu polo menos neste caso teño a sensibilidade… Gústanme as artes, son deseñadora e como tal teño unha sensibilidade. Non como muller, porque creo que non é unha característica soamente das mulleres. Paréceme que é das persoas. Neste caso pola miña profesión, creo que a teño.
Quizá coa flor de toxo é co que máis representada me vexo, pero son moi galega. Levo a miña terra moi dentro de feito puiden saír de Galicia en varias ocasións polo fútbol sala, pero nunca quixen facelo porque a miña terra tírame moito. Emociónome con todo o da miña terra. Fun seleccionadora galega de categorías inferiores e esta última vez, seleccionadora absoluta, para min, iso é o máis do mundo!
Bea Seijas: “Pero a flor de toxo e Galicia están moi dentro de min, creo que son dúas características, que son moi miñas. Esas dúas son coas que máis me representan”
Así que me vexo moi representada coa flor de toxo, con Galicia e tamén coa cidade de Ourense. Aínda que non nacín en Ourense (son Ferrolá e teño á miña Ferrol moi dentro), Ourense é unha cidade que me marcou moito. Levo moitísimo tempo aquí (máis que en Ferrol) e tamén é unha cidade que á que teño moito agarimo e véxome moi representada con Ourense.
Pero a flor de toxo e Galicia están moi dentro de min, creo que son dúas características, que son moi miñas. Esas dúas son coas que máis me representan.
O Ourense Ontime FSF redeseña o seu escudo e incorpora unha flor de toxo con moito significado
