A capitá do Duran Maquinaria Ensino, Bea Sánchez, asegura que o deporte feminino “leva anos nun momento doce” pero denuncia que a “situación laboral no deporte feminino está moi lonxe de equipararse en canto a condición de traballo e soldo ao masculino. Falta de profesionalismo, cláusulas antiembarazo…”. Esta deportista afirma que é fundamental traballar para promover a equidade no deporte e a igualdade efectiva promovendo a participación das mulleres no deporte e fomentando a súa presencia en todos os ámbitos deportivos: dirección e xestión, arbitraxe, adestramento, formación…”
A.N.: Consideras que o papel da muller no deporte é igualitario?
Bea Sánchez: O deporte é unha das actividades que máis trabas e resistencias presenta á igualdade. Cando falamos de deporte feminino, sempre se xulga en comparación con parámetros masculinos e está claro que non debe ser así. O deporte feminino débese visibilizar.
A.N.: Ao respecto da anterior pregunta, responde Galicia ao patrón estatal ou observas diferencias? En caso de ver diferencias, a situación galega sería mellor ou peor que a estatal?
Bea Sánchez: Penso que en xeral en España trabállase por esa vibilidade da muller no mundo do deporte. Apóstase cada vez máis e súmase con diferentes programas ou campañas, pero certo é que aínda estamos moi lonxe desa equidade.
A.N.: En que momento da túa vida tropezaches por vez primeira cunha discriminación por xénero no deporte?
Bea Sánchez: Persoalmente non me teño atopado con ningunha.
A.N.: Observas que por ser muller existen maiores dificultades para a práctica deportiva a niveis de competición?
Bea Sánchez: É máis ben unha cuestión de recursos.
A.N.: Na túa opinión, hai límites ou teitos de cristal para o acceso da muller a diferentes postos no mundo do deporte á marxe do papel de deportistas (adestradoras, directivas, preparadoras físicas, etc)?
Bea Sánchez: É verdade que cada vez vemos máis adestradoras ou preparadoras físicas, pero en comparación seguimos sendo unha porcentaxe moi baixa.
É fundamental traballar para promover a equidade no deporte e a igualdade efectiva entre mulleres e homes, promovendo a participación das mulleres no deporte e fomentando a súa presencia en todos os ámbitos deportivos: dirección e xestión, arbitraxe, adestramento, formación…
Bea Sánchez, xogadora do Ensino: “É fundamental traballar para promover a equidade no deporte e a igualdade efectiva entre mulleres e homes, promovendo a participación das mulleres no deporte e fomentando a súa presencia en todos os ámbitos deportivos: dirección e xestión, arbitraxe, adestramento, formación…”
Bea Sánchez: “Hai unha evolución positiva pero repítense patróns de desigualdade”
A.N.: Con respecto a cando empezaches a túa vinculación co deporte, hai agora menos trabas? Houbo unha evolución positiva no tempo?
Bea Sánchez: Hai unha evolución positiva no tempo desde que eu comecei. Grazas á asociación de xogadoras de baloncesto (AJUB) e á Federación Española conseguíronse melloras no baloncesto feminino, pero repítense os mesmos patróns de desigualdade desde hai décadas.
A.N.: Cales consideras que son os principais atrancos que ten hoxe unha muller para desenvolver unha carreira deportiva?
Bea Sánchez: A situación laboral no deporte feminino está moi lonxe de equipararse en canto a condición de traballo e soldo ao masculino. Falta de profesionalismo, cláusulas antiembarazo…
Bea Sánchez, xogadora do Ensino: “Eu vivo do baloncesto, pero sei que moitas compañeiras non poden dicir o mesmo e o alternan con varias actividades laborais”
A.N.: Pódese vivir do deporte sendo muller?
Bea Sánchez: Esta pregunta é relativa, persoalmente vivo do baloncesto. Pero sei que moitas compañeiras non poden dicir o mesmo e o alternan con varias actividades laborais.
A.N.: Como limita a progresión ter que compaxinar a práctica deportiva con outro tipo de actividades profesionais?
Bea Sánchez: Imaxínate prepararte física e mentalmente para poder desenvolver a túa práctica deportiva ao mellor nivel, e ter que compaxinalo cun traballo para poder vivir, debido ao salario. Paréceme un despropósito, pedir o máximo rendemento deportivo pero non estar apoiada por unhas boas condicións laborais.
Bea Sánchez, xogadora do Ensino: “Paréceme un despropósito, pedir o máximo rendemento deportivo pero non estar apoiada por unhas boas condicións laborais”
A.N.: Que mudarías do deporte actual para camiñar cara a unha igualdade plena?
Bea Sánchez: As atletas españolas seguimos enfrontándonos aos mesmos problemas que hai décadas e reivindicamos unha mellora das nosas condicións laborais.
Precariedade laboral, escasa cobertura nos medios de comunicación, existencia de cláusulas antiembarazo, desigualdade nas axudas recibidas… son os problemas cos que chocamos hoxe por hoxe.
A.N.: Hai quen avoga polo deporte mixto máis aló da base como unha posibilidade? Es partidaria?
Bea Sánchez: Cando falamos de deporte profesional, non son partidaria do mixto. Ben é certo que en categorías de formación, é unha moi boa opción. A oportunidade de que unha nena poida practicar o deporte que lle gusta, xa é algo moi positivo, ademais que isto só abre a porta a moitas opcións. Antes só se vía no fútbol se cadra, pero agora esta modalidade tense estendido a todos os deportes e o abano de posibilidades es máis amplo e enriquecedor para as nosas deportistas.
A.N.: Cres que o deporte feminino está a vivir un momento doce?
Bea Sánchez: O deporte feminino leva varios anos no seu momento doce, deportes como fútbol, balonmán, natación, baloncesto… superan con creces as expectativas e cada torneo internacional rómpese unha barrera máis.
En baloncesto, en particular, a Selección Española demostrou con creces que está a un altísimo nivel, e así o amosa en cada cita europea o mundial.
Bea Sánchez, xogadora do Ensino: “Precariedade laboral, escasa cobertura nos medios de comunicación, existencia de cláusulas antiembarazo, desigualdade nas axudas recibidas… son os problemas cos que chocamos hoxe por hoxe”
A.N.: Ao fío desta última pregunta valora de 0-10 (sendo 10 o mellor) o momento actual do deporte feminino nestes ámbitos:
Bea Sánchez:
- Resultados deportivos _________________ 10
- Visibilidade en xeral na sociedade ________ 4
- Repercusión mediática _________________ 4
- Apoio de seareiros/as __________________ 5
- Patrocinios ___________________________ 4
- Apoio das diferentes administracións ______ 4
