O Durán Maquinaria Ensino perde á súa capitá para a vindeira campaña. Bea Sánchez deixa Lugo despois de dúas tempadas co equipo.
A ala-pívot deixa a que foi a súa casa nos dous últimos anos. Sánchez quixo despedirse de club e afección no seu perfil de Twitter cunha mensaxe na que expresaba o seu agradecemento á cidade, staff, compañeiras e público: “Grazas LUGO por facer destas dúas tempadas a miña casa!”.
GRACIAS @EnsinoLugoCB ❤️ pic.twitter.com/15bDc269ZQ
— Bea Sánchez (@BeaSanchezM89) May 3, 2021
Pola súa parte, o Ensino tamén tivo unhas palabras para a xa ex xogadora: “Grazas por estas dúas tempadas nas que puxeches a túa calidade como deportista e sobre todo humana ao servizo do equipo e de todas as túas compañeiras. Desexámosche os maiores éxitos profesionais e persoais no futuro”.
Os números de Bea Sánchez
A andaluza é case galega de adopción despois de oito tempadas vestindo a camiseta de equipos galegos. Durante seis anos interrompidos Sánchez militou no BAXI Ferrol, para chegar ao Ensino na tempada 2019/2020.
Nestas dúas campañas coas lucenses, a ala-pívot desfrutou de máis de mil minutos en pista na competición regular, con oportunidade de competir na Copa da Raíña nos dous cursos e no play off no último. Neste último ano, a xogadora acadou unha valoración de 218 puntos na liga regular. En total, a baloncestista asinou 292 dos puntos que fixo o Ensino na liga estes dous últimos cursos.
Na tempada 2020/2021, foi a máxima reboteadora do Ensino na liga regular, cunha media de 5,55 por partido, e a cuarta máxima anotadora desde a liña de tres no club lucense, cunha media de acerto do 36,96%.
