A nadadora galega Bea Gómez, que agora compite no CN Santa Olaya asturiano, participou con gran éxito no Campionato de España de Inverno de Natación en piscina curta que tivo lugar en Castellón. A deportista pontevedresa acadou a medalla de ouro na distancia de 800m libres cun tempo de con 8:30.30, a de prata nos 400m libres con 4:09.30 e fíxose co bronce coa galega Aroa Silva no seu equipo no 4x200m libres (con elas nadaron nas postas Laura Lorenzo e Helena Robla).
Na mesma distancia que Gómez Cortés se facía co ouro, a tamén galega Aroa Silva Fidalgo, compañeira de Bea Gómez no C.N. Santa Olaya e bolseira do CGTD, foi segunda cun tempo de 8:36.75 compartindo así podio. Ademais, esta nadadora galega foi cuarta en 400m libres cun crono de 4:11.42. No 4x200m libres compartía equipo con Cortés xunto á que asinou o bronce.
Antía García Silva foi outra das galegas que participou neste LXIV Campionato de España Absoluto de Inverno P25. A deportista do CN Galaico acadou un undécimo posto nos 50m libres cun tempo de 26.13 e foi 15ª nos 50m bolboreta. Nesta proba acadou unha marca de 27.92 que supuxo un récord galego absoluto e a súa mellor marca persoal.
Alba Gómez Mesías do C.N. Arteixo participou nun total de cinco probas, destacando sobre todo nos 200m libres, que se nadaba o último día. Nela acadou o sétimo posto na clasificación con 2:01.01. Nas demais probas, dúas delas competidas na serie máis rápida, acadou os seguintes postos, novena en 100m libres con 56.53, décima en 200m estilos con 2:19.21. Na proba de 400 libre participaba sen opción a clasificación, pero tamén fixo moi bo rexistro persoal ademais acadou o posto 12º en 50 libre con 26.23.
Desde o C.N. Arteixo destacan que o Campionato de España tivo “un protocolo impecable por parte dos organizadores, permitiu que se celebrara como un gran evento seguro e con moi bo nivel competitivo, récords de España incluídos”.
Este campionato estatal de piscina curta celebrouse en Castellón de venres a domingo, nun total de cinco sesións.
Bea Gómez. a olímpica en Londres que quedou ás portas de Río
Hai anos que Bea Gómez Cortes é unha das nadadoras galegas de referencia. Foi olímpica en Londres 2012, campioa mundial Junior en 200m estilos no 2011, e quedou ás portas dos Xogos Olímpicos de Río. Unha doenza cardíaca a apartou da competición un tempo impedindo que a nadadora fose quen de acadar as marcas necesarias a tempo para as clasificación. A súa forza de vontade e o seu traballo para poñerse a punto buscando estar na cita olímpica brasileira foi digna de elogio aínda que non acadara o obxectivo final.
Consulta aquí todos os resultados doLXIV Campionato de España Absoluto de Inverno P25 – Astralpool
