A xogadora Bea Gaete seguirá co HC Deportivo Liceo competindo na vindeira tempada na OK Liga. A chilena, unha das figuras claves do ascenso, seguirá formando parte das verdibrancas un curso máis.
“Estou moi contenta por contarlles que continuarei xogando unha tempada máis aquí no Liceo, así que espero que vexamos unha gran tempada co equipo e que a podamos desfrutar xuntos”, declarou a capitá da Selección Chilena.
¡#Liceístas, Bea Gaete ten unha mensaxe para vós! pic.twitter.com/Ie7CYySbKO
— Hockey Club Liceo Feminino (@HCLiceoFem) June 2, 2021
Durante a tempada na OK Prata Feminina, Gaete disputou 10 partidos como verdibranca, nun ano no que as coruñesas certificaron a promoción para subir á categoría de ouro a falta de tres xornadas para a súa conclusión. Nestes partidos a chilena anotou sete goles.
Ademais, Gaete conta cunha ampla traxectoria internacional. Comezou no mundo do hoquei aos 13 anos e no 2014 xa era capitá do combinado do seu país. Tamén ten experiencia no hoquei español e na OK Liga, categoría que disputou cando xogaba para o CP Las Rozas.
O HC Deportivo Liceo estrea redes para o equipo feminino
O club aproveitou o anuncio da renovación de Bea Gaete para estrear novas contas en redes sociais, adicadas exclusivamente ao equipo feminino.
O novo equipo da OK Liga contará con presenza en Twitter, Facebook e Instagram. O club coruñés tomou a decisión de crear estas contas para reforzar a cobertura mediática do seu combinado feminino. Nestas redes poderá seguirse toda a actualidade do conxunto, os seus partidos e as retransmisións, así como as previas e as últimas novidades.
As contas habituais cubrirán a partir de agora a información xeral do club, tratando as novidades institucionais e as do equipo masculino.
