Non coñecen a derrota, e non queren errar xusto cando acariñan cifras de récord. Este sábado, 20 de febreiro, ás 18:30 horas as xogadoras do BAXI Ferrol buscarán na pista da ADBA a súa 21ª vitoria na 21ª xornada da Liga Feminina 2. Esa cifra, ademais de falar da magnífica tempada que están a facer as departamentais, suporía que o conxunto que adestra Lino López igualaría o récord de trunfos consecutivos do club e da categoría, a LF2.
As ferrolás actúan como visitantes ante un rival da zona baixa da clasificación. A ADBA ocupa a décima posición da categoría de prata, cun saldo de cinco vitorias, como outros tres equipos, e quince derrotas, polo que suman 25 puntos.
Nas súas filas, co adestrador ferrolñan Sergio Cubeiro á fronte, cinco xogadoras son titulares indiscutibles e previsiblemente tamén o serán ante o BAXI Ferrol.
Para o técnico do equipo visitante, Lino López, o nivel que demostra este curto plantel o fai merecedor da permanencia. “Contan cun plantel moi curto, con moito protagonismo tanto en minutos como no xogo de cinco xogadoras. Creo que, aínda que non matematicamente, virtualmente teñen a permanencia case garantida”.
Lino López: “(Sobre a ADBA) Aínda que non matematicamente, virtualmente teñen a permanencia case garantida”
O partido poderá visualizarse vía streaming no Canal FEB.
Altas e baixas no BAXI
Para esta cita, á que as todopoderosas líderes da categoría chegan tan fortes coma sempre, estará tamén nas súas filas Julieta Mungo. A baloncestista xa está recuperada dun edema no xeonllo.
“Julieta xa puido adestrar algo e pode que xa xogue algúns minutos”, declaraba o seu adestrador. Porén, Lino López non poderá con tar aínda con Natalia, que segue de baixa xa que no adestramento do xoves volveuse mancar o nocello. A xogadora terá que pasar outra semana lonxe do parqué.
Sobre o resto das súas pupilas, López engadiu que “están ben e trataremos de seguir crecendo e de preprar cousas para a fase de ascenso”.
