O BAXI Ferrol conta cunha nova incorporación no seu corpo técnico. Trátase da psicóloga deportiva Patricia Gómez da Torre, que comezou a traballar co equipo a semana pasada.
Segundo informan desde o propio club ferrolán, o seu traballo centrarase no adestramento de habilidades psicolóxicas que permitan ás xogadoras potenciar o seu rendemento.
Patricia Gómez non traballará só coas xogadoras do BAXI, senón que tamén o fará cos adestradores, para que estes poidan mellorar tanto a nivel individual como en beneficio do equipo.
As integrantes do cadro ferrolán acolleron con gran satisfacción esta decisión do club: “Nestes tempos é moi importante contar con alguén no equipo que sexa capaz de axudar en aspectos mentais que tanto inflúen no rendemento dos deportistas”, aseguran desde o equipo departamental.
Experiencia psicolóxica para o BAXI
Patricia Gómez da Torre realizou os seus estudos de psicoloxía na Universidade Francisco Vitoria, de Madrid, e fixo un master de psicoloxía deportiva na Universidade Autónoma de Madrid.
Realizou prácticas no Centro de Alto Rendemento de Madrid, no Club de Tenis Chanmartín e no Club Gimnasia Rítmica Euritmia de Madrid. O acordo entre ambas as partes é ata o final da presente tempada, pero coa intención de que se amplíe para as seguintes campañas.
Procura de reforzos
Por outra banda, o BAXI Ferrol está a tratar de reforzar o persoal coa chegada dalgunha xogadora que poida dar un salto de calidade ao equipo para as últimas doce xornadas do campionato.
Nestes momentos, tal e como admiten desde o club, non hai moitas xogadoras libres no mercado e, malia que desde Ferrol están dispostas a realizar un esforzo económico importante, aínda non hai ningunha xogadora que conte coa aprobación do corpo técnico.
Desde a dirección deportiva están a traballar intensamente para tratar de pechar algunha fichaxe esperando que pronto poidan frutificar as negociacións.
Mentres, o equipo segue adestrando con normalidade no pavillón da Malata, coa única ausencia da capitá Patri Cabrera, que está confinada pola COVID-19, aínda que se espera que este venres poida incorporarse á disciplina de traballo coas súas compañeiras.
O próximo partido do conxunto ferrolán será o mércores 16 de febreiro, a partir das 20:30 horas na cancha do pechacancelas Tenerife.
