O sábado 4 de marzo, o BAXI Ferrol levará a cabo o acto de retirada da camiseta coa que a deportista canaria Patri Cabrera xogou durante 7 tempadas no conxunto departamental.
Ao finalizar o encontro da liga Challenge que o cadro departamental disputará, ás 19.00 horas, no pavillón da Malata diante o Melilla Sports Capital, celebrarase un acto de homenaxe á xogadora Patri Cabrera. Durante o mesmo vaise proceder á retirada da súa camiseta co dorsal número 8, dorsal co que xa ninguén vai xogar no futuro no equipo Universitario.
Patri Cabrera é a xogadora con máis minutos na historia do BAXI Ferrol
Cabe destacar que Patri Cabrera é a xogadora que máis partidos disputou na historia do club, con 198. Co BAXI Ferrol esta xogadora competiu, nas sete tempadas nas que xogou: cinco en Liga Feminina e dous en Liga Feminina 2.
Cabrera ostenta o récord de triplos nun partido, na liga Endesa, con 10 canastras de tres. Iso permitiulle participar en dúas ocasións no Concurso de Triplos da ACB enfrontándose aos homes.
Patri Cabrera decidiu retirarse a tempada pasada da súa faceta como xogadora, quedándose no club como adestradora do equipo senior de Autonómica, dun cadete feminino e dun premini masculino.
Ademais, a deportista canaria, é a coordinadora do proxecto UNI2, de baloncesto inclusivo, unha iniciativa na que o club realizou unha aposta e na que máis de sesenta persoas participan dos adestramentos, que se desenvolven diariamente no pavillón de Esteiro.
