O BAXI Ferrol completa esta fase da Liga Femina 2 cun pleno de vitorias. Vinteseis de Vinteseis trunfos posibles. Unha serie de vitorias consecutivas que fan historia. A súa última vítima, o conxunto galego do Ulla Oil Rosalía ao que duplicou en puntos ao final do partido (44-88).
A principio de tempada era impensable que o BAXI Ferrol puidese completar a liga regular con todos os partidos gañados, pero o equipo de Lino López mostrouse moi superior aos seus rivais e onte alcanzou o pleno de vitorias ao colleitar o seu último trunfo neste fase na cancha do conxunto galego do Ulla Oil Rosalía por un marcador de 44-88.
O conxunto ferrolán afrontou o choque coa ausencia de Irene Gari, que está a se recuperar dunha microrrotura fibrilar, e o técnico, Lino López, decidiu que dispuxesen de máis minutos neste choque algunhas das xogadoras que xogaron menos ao longo da tempada, pero volveuse a demostrar que hai un bo bloque e que todo o mundo cumpre cando está sobre a cancha.
Desde o principio, o cadro departamental deixou claras as súas intencións e lle endosou un parcial de 0-8 inicial ás deportistas adestradas por Chiqui Barros. Esa vantaxe foise incrementando até chegar ao final do primeiro cuarto cun 10-24.
O equipo ferrolán non baixa o nivel xa que para elas cada partido é unha preparación máis de cara a fase de ascenso a Liga Endesa. De aí que non relaxen o ritmo ante ningún rival nin en ningún momento dos partidos nos que encestan e encestan sen piedade sen diminuir a intensidade nin cando teñen o partido máis que encarrilado.
Así, o equipo que adestra Lino López tomouse o choque para seguir probando cousas de cara á fase de ascenso e volveu defender moi intenso e con presión a toda a cancha, o que lle permitiu roubar moitos balóns e chegar ao descanso cun 20-45.
A medida que avanzaba o encontro, a diferenza entre ambas as escuadras facíase máis notable, porque o equipo santiagués do Ulla Oil Rosalía, roto, era incapaz de seguir o ritmo das pupilas de Lino López, que acabaron o terceiro parcial cun 33-64.
No último cuarto as de Ferrol non baixaron intensidade
Nos dez últimos minutos do BAXI Ferrol seguiu coa súa velocidade de cruceiro e con moita intensidade, para anotar con suma facilidade mentres que ao seu rival custáballe moito superar o seu armazón defensivo. Así, chegouse ao final do encontro cunha contundente vitoria por 44-88 das ferrolás que xa teñen a mente na loita por subir un peldaño máis no baloncesto feminino estatal.
Líderes indiscutibles, con 2203 puntos anotados e 1310 recibidos, teñen unha diferencia no average de 893 ao seu favor. O BAXI Ferrol, defende, ataca e non se rendo. Queda por ver se na fase de ascenso pode manter este nivel e acompañar o ano próximo ao Durán Maquinaria Ensino na elite do basket feminino español.
FICHA TÉCNICA
44) ULLA OIL ROSALÍA: Sara Corredoira (6), Ángela González (6), Sarai Carro (3), Nerea Liste (4) e Blanca Manivesa (4) – quinteto inicial -. Tamén xogaron: Ana de Matías Gil (-), Carla García de Castro (6), Paula Rivas (4), Nuria Choren (2), Marta López (-), Laura Golpe (-) e Clara Riera (9).
88) BAXI FERROL: Brooke Salas (15), Laura Fernández (5), Patricia Cabrera (9), Geraldynn Leaupepe (22) e Anniina Aijanen (8) – quinteto inicial -. Tamén xogaron: Julieta Mungo (11), Patricia Benet (2), Natalia Rodríguez (5), Andrea Boquete (5) e Sune Swart (6).
PARCIAIS: 10-24, 10-21, 13-19 e 11-24.
ÁRBITROS: Diego Fernández Requejo e Christina Abalo Buceta. Sen excluídas.
INCIDENCIAS: Partido nº 26 da fase regular da Liga Feminina 2 da FEB disputado no Pavillón do Instituto Rosalía de Castro en Santiago de Compostela (A Coruña)
