O BAXI Ferrol inicia a campaña de abonados para a próxima tempada, na que vai competir na Liga Femenina Endesa, baixo o lema “Contamos Contigo”, coa intención de incrementar o número actual de abonados, que está en 1.198.
Xa se poden dar altas e renovacións, “na Taberna Arauxa, no Cantón de Molins 6 baixo, en horario de 12.00 a 14.00 e de 18.00 a 22.00 horas, de martes a domingo, así como a través do correo electrónico abonadosuniferrol@gmail.com”, segundo informa o club ferrolá.
Explican desde o BAXI Ferrol que “hai dous tipos de tarifas, as das persoas que foron abonados durante a tempada 22-23 e as novas altas”.
“No caso das persoas que forman parte da masa social na actualidade, poderán renovar o seu abono familiar, válido para dúas persoas, por 130 euros, mentres que os abonos club, para os familiares dos nenos da canteira, 90 euros. Os individuais custarán 75 euros, e os mozos, de 18 a 25 anos, 40 euros. Por último, os nenos entre 6 e 17 anos pagarán 20 euros, mentres que os nenos que pertenzan á canteira terán o abono gratis”, detallan desde o BAXI Ferrol.
En canto ás novas altas, “o prezo do abono familiar será de 160 euros, o de abono club de 100 euros, o individual de 90, o junior de 45 euros e o de nenos de 25 euros”, segundo informa o equipo da cidade departamental.
Desde o club confían que a comarca “axude ao equipo na nova categoría cun incremento da masa social, que poida permitir consolidar o proxecto na máxima categoría do baloncesto feminino español”.
