Unha ducia de equipos da Liga Feminina 2 loitarán do 8 ao 11 de abril en Leganés por ascender á Liga Endesa. Entre deles están, dous conxuntos galegos de diferentes provincias: Celta Zorka Recalvi e BAXI Ferrol. En ambos os dous clubs están moi pendentes do sorteo que terá lugar o próximo martes 30 de marzo e que determinará os cruces desta fase final da Liga Feminina 2.
Tal e como estaba estipulado, loitarán polas dúas prazas de ascenso a Liga Feminina Endesa os catro primeiros clasificados do Grupo A: Baxi Ferrol, Osés C. Ardoi, Celta Zorka Recalvi e Extremadura Miralvalle Plasencia, os catro primeiros do Grupo B: Laboratorios Ynsadiet Leganés, Pacisa Alcobendas, UCAM Primafrío Jairis e Sinergia Real Canoe, mailos catro primeiros do Grupo C: Barça CBS, Lima-Horta Barcelona, Snatt’s F. Sant Adrià e Advisoria Maresme.
O caso do Extremadura Miralvalle Plasencia é singular e histórico, xa que as estremeñas estará na loita polo ascenso na súa primeira tempada na categoría de prata.
Sistema de competición da fase final da LF2
A fase final terá lugar no Pavillón Europa de Leganés do 8 ao 11 de abril. Antes, o vindeiro martes 30 ás 11:00 horas, celebrarase o sorteo de grupos no que sairán catros grupos de tres equipos cada un.
O primeiro equipo clasificado de cada grupo será o que avanzará até a ronda de semifinais. De aí sairán os dous equipos que ascendan a Liga Endesa, a máxima categoría do baloncesto feminino estatal.
Ao ter que disputar os partidos dun xeito tan concentrado, será fundamental o fondo de armario que teñan os bancos. As rotacións deberá ser continuas e non se pode notar un baixón de rendemento sexa quen sexa o quinteto que esté pelexando os puntos na pista de Leganés.
O cansanzo acumulado de toda a tempada, xunto con que ten sido un curso peculiar no que atinxe á preparación física (debido a escasa pretempada e tamén aos paróns por positivos en COVID-19 que moitos conxuntos sufriron nesta Liga Feminina 2, ao igual que noutras categorías), pode pasar factura no aspecto físico e terminar por ser un aspecto máis a ter en conta nesta loita polo ascenso.
Dosificar esforzos pero sen baixar o pistón. Unha contradición que se fai realidade sempre que chegan este tipo de fases finais competitivas concentradas en poucos días de xogo.
BAXI no bombo 1 e Celta no bombo 3
O BAXI Ferrol acadou 26 vitorias de 26 partidos posibles na primeira fase da Liga Feminina 2 / UNIVERSITARIO FERROLBAXI Ferrol, Ynsadiet Leganés e Barça CBS formarán parte do Bombo 1 polo que serán cabezas de serie. Logo sairán os equipos clasificados en segundo lugar (Osés Construcciones Ardoi, Pacisa Alcobendas e Lima – Horta Barcelona). O que salga en primeiro lugar irá ao Grupo 4 como cabeza de serie. E así irán colocándose os equipos evitando no posible que coincidan equipos do mesmo grupo.
Con ese condicionante irán saíndo os equipos do terceiro bombo (Celta Zorka Recalvi, UCAM Primafrío Jairis e Snatt’s F. Sant Adrià) e os do cuarto (Extremadura Miralvalle, Sinergía Real Canoe e Advisoria Maresme).
Segundo informa a Federación Española de Baloncesto, do 8 ao 10 de abril xogarase a liguiña de todos contra todos. Catro partidos diarios con catro equipos descansando.
Na cuarta xornada os primeiros clasificados enfrontaranse entre si (o campión do Grupo 1 contra o campión do Grupo 2; e o do Grupo 3 ante o do Grupo 4). Os dous vencedores ascenderán a Liga Endesa, unha categoría que xa conta cun equipo galego, o Durán Maquinaria Ensino de Lugo, pero que podería ter sitio para dous máis no seguinte curso 2021-22.
