O presidente do BAXI Ferrol, Leopoldo Ibáñez, compareceu en rolda de prensa, acompañado da xogadora Patri Benet, para concienciar da importancia de apoiar ao equipo no encontro que o sábado 7 de marzo, ás 19.00 horas, disputa no pavillón da Malata ante o Celta Zorka. Un triunfo do conxunto departamental achegaríalle á promoción de ascenso á Liga Endesa.
Aproveitando que o domingo se celebra o 8M, Día da Muller, desde o club púxose á venda entradas, a só dous euros, para todas as mulleres que desexen acudir a ese encontro. O presidente da entidade destacaba que “necesitamos que as mulleres participen máis e queremos ter máis presenza de público, porque nos xogamos moito no partido”.
O máximo dirixente da entidade engadía: “Gustaríanos que as mulleres apoiasen máis o deporte feminino e por iso decidimos pór unha entrada moi barata, a só dous euros, para que vaian ver o partido e tratemos de enganchalas”.
Pola súa banda, a xogadora do BAXI Ferrol, Patri Benet, destacaba: “As mulleres témonos que concienciar de que se pode xogar ao baloncesto ou a calquera outro deporte até unha idade avanzada e que se pode compaxinar perfectamente o deporte cos estudos ou cun traballo”.
Patri Benet, xogadora do Baxi Ferrol: “Gustaríanos que moitas máis mulleres fosen aos partidos e que toda a comarca nos apoiase nestes momentos, porque nos estamos xogando o poder entrar na fase de ascenso e sería bonito poder volver subir á máxima categoría”
Por iso, Patri Benet, do BAXI Ferrol, engadía: “Gustaríanos que moitas máis mulleres fosen aos partidos e que toda a comarca nos apoiase nestes momentos, porque nos estamos xogando o poder entrar na fase de ascenso e sería bonito poder volver subir á máxima categoría”.
Para facilitar a venda de entradas para o partido do sábado, o club puxo dous puntos de venda no centro da cidade, o Bar Sur, na rúa Magdalena, e a Taberna Arauxa, no Cantón de Molins. As mulleres e nenos terán que pagar dous euros e os homes manterán o prezo habitual de dez euros.
Partido solidario do Baxi Ferrol
Dentro da campaña de partidos solidarios que o club realiza esta tempada, o encontro do sábado ante o Celta está dedicado á Asociación de Enfermos do Crohn e Colitis Ulcerosa. Por ese motivo, os afectados por esa enfermidade poderán asistir ao partido gratis e desde a súa asociación farán visible a súa enfermidade ás persoas que acudan ao pavillón.
