Xornada de cara e cruz para as galegas da LF Endesa. BAXI Ferrol e Durán Maquinaria Ensino atópanse na zona baixa da clasificación, pero o seu xogo é dun nivel superior. Os dous equipos chegaron á prórroga nos seus partidos (dous tempos extras no caso das ferrolás), pero só as lucenses sumaron os dous puntos.
Estas recibían en casa ao Tenerife, que precisamente gañara ao BAXI días antes. As canarias eran tamén un rival directo para as xogadoras adestradas por Fernán Varela e as lucenses lograron in extremis unha vitoria vital por un 75-74.
Menos sorte tiveron en Ferrol, onde as universitarias tamén se xogaban dous puntos importantes para saír do pozo. Outra vez máis, as xogadoras de Lino López deron un espectáculo na pista, forzando a prórroga, pero sen obter recompensa. O BAXI caeu ante o Euskotren por un 86-89.
O Pazo levou ao Ensino á vitoria
O Durán Maquinaria Ensino recibía no Pazo a outro equipo da cola, o Tenerife, nun duelo no que a afección foi a sexta xogadora. Arroupadas polo público, as lucenses sacaron forzas para un tempo extra que remataría en vitoria local.
Desde os primeiros minutos, o encontro destacou pola intensidade de ambos bandos. Van den Adel nas galegas lideraba a puntuación, aínda que Raksanyi e as visitantes non se quedaban atrás. Aproveitando os tiros de tres da 10 e de Aliaga o Ensino tomou vantaxe, pero o cuarto rematou co Tenerife pisándolle os talóns nun 26-21.
No segundo tempo, as galegas seguiron apostando polos tiros exteriores para aumentar distancias, pero as canarias aproveitaron os tiros libres e baixo o aro para darlle a volta ao marcador e colocarse por diante. Ocete e Gorecki adiantaban ás súas para deixar o partido no 36-39 no descanso.
Despois da reanudación, de novo Van den Adel abría a lata galega, con dous tiros libres tras a falta de Plaisance. Ata pasado o ecuador deste cuarto, o marcador apenas mudou debido á intensidade defensiva dos dous conxuntos. Pasados os minutos, o Ensino aumentou a presión en ataque, pero sen lograr reducir distancias os últimos dez minutos chegaron cun axustadísimo 53-56.
A tensión podía palparse no Pazo, onde a afección apoiaba ás lucenses desde a bancada. Van den Adel e Aliaga apretaban para a remontada desde o tiro exterior, mentres que Montenegro e Hruscakova anotaban para as visitantes. As locais seguiron apurando as súas posibilidades, ata lograr facer o 67-67 con catro tiros libres case sobre a bucina final, levando o partido á prórroga.
O tempo extra comezou de cara para as galegas, cun triplo de Chatrice White, devolvendo o dominio do luminoso ao Ensino. As locais lucíanse na defensa, evitando que o Tenerife se recuperara do golpe. As canarias conseguiron anotar ata devolver o empate, pero un tiro de Lizarazu deulle finalmente á vitoria ás galegas por un 75-74.
Dous puntos moi necesarios para un Durán Maquinaria Ensino que despois de recuperar a moitas das súas xogadoras aínda ten por diante o reto de alonxarse dos postos de descenso.
⏰ FINAL FINAL FINAL ‼️‼️‼️‼️‼️
Victoria en la prórroga. Victoria de equipo, gracias Pazo‼️‼️‼️‼️‼️
Jornada 21 🏆#LFEndesa
Ensino Lugo 7️⃣5️⃣@CBClarinos 7️⃣4️⃣
📸 Rebeca Fernández @rebeca_1826
📲 Twitter @EnsinoLugoCB pic.twitter.com/eEPh2rkxDV— Ensino Lugo (@EnsinoLugoCB) February 20, 2022
O triplo de Natalia Rodríguez forzou a prórroga na que o BAXI non afianzou o triunfo
O outro club galego da máxima categoría, o BAXI Ferrol, tamén disputaba en casa un duelo que precisaba vencer para romper o mal momento deportivo. Con todo, a sorte non acompañou ás de Lino López.
A Malata recibía ao sexto clasificado na táboa e foi testemuña dunha gran actuación das ferrolás. Así, as universitarias saíron enchufadas ao parqué, e nos primeiros intres dominaron o partido, adiantando ao equipo no marcador sendo superiores nos tiros. Ivanovic e Swart destacaban coas súas canastras, ás que se uniría Natalia Rodríguez coa súa entrada pasado o ecuador do primeiro cuarto. O Euskotren perdía fole co paso dos minutos, e as ferrolás aproveitaron a situación para ampliar vantaxe antes do remate do tempo nnu 27-21.
No segundo cuarto, o colchón de puntos obtido polas galegas foi dobremente valioso, ante un conxunto rival que aumentaba o nivel para reducir distancias. O poder cambiaba constantemente de mans, pero as universitarias, apoiadas polo público, non baixaban os brazos. Unha impresionante Rodríguez non perdoaba desde o triplo, mantendo ao seu equipo no partido malia os puntos que as vascas sumaban desde o tiro libre. O descanso chegou co marcador no 44-38.
O paso por vestiarios reactivou ao Euskotren, que saltou á cancha disposto a levarse o partido. Incrementando os tiros ao aro, as visitantes lograban adiantarse da man de Cox e Alou, protagonistas no cadro visitante. Neste cuarto o BAXI non foi quen de manter o nivel demostrado na primeira parte, e viu como as contrincantes inclinaban a balanza ao seu favor antes do derradeiro cuarto.
Pero o tesón das ferrolás fixo que o cuarto non fora o último tempo do partido. Despois dos golpes recibidos no terceiro tempo, o equipo de Lino López volveu ao ataque cun xogo coral que inmobilizaba ás vascas á vez que recuperaba o terreo perdido no marcador. A falta duns escasos 30 segundos para o final, Natalia Rodríguez fixo un impresionante triplo que levaba o duelo á prórroga.
A intensidade do encontro seguiu no tempo extra, e o balón cambiaba rapidamente de mans, sen designar a un líder na pista universitaria. De novo en empate, o BAXI xogábase o partido ao límite, e volveu asinar unha fazaña. Carmen Grande estivo a piques de dar a vitoria ás galegas, pero o seu tiro non tocou a rede e foi necesario un novo cuarto para desempatar.
Finalmente, a vitoria escapóuselle unha vez máis ás universitarias, que viron como o triunfo ía para o Euskotren por un axustado e inxusto 86-89.
