Nin o equipo revelación da coa clave para vencer ao BAXI Ferrol. As xogadoras de Lino López confirmaron o seu dominio na LF2 cunha vitoria abultada ante o Extremadura Miralvalle Plasencia, cun 92-43 que devolve as mellores sensacións ao cadro ferrolán.
O 16 de xaneiro chegaba a 16ª vitoria do BAXI Ferrol. Un equipo que demostra por méritos propios que é merecedor do ascenso de categoría, vencendo xornada tras xornada e rival tras rival, sen importar o seu nivel. O conxunto que tiñan por diante para este duelo podería ter sido o indicado para dar a sorpresa, ao ser un novato na Liga Feminina 2, pero estar entre os mellor clasificados.
Finalmente, non foi así, e as ferrolás souberon controlar o partido na súa pista con comodidade desde o segundo cuarto, cando cunha gran actuación de Patricia Cabrera romperon o encontro ao seu favor.
O BAXI reencontrase coas vitorias abultadas
Moitas das vitorias que sitúan ao BAXI Ferrol como líder indiscutible foron superando os 90 puntos e logrando resultados abultados cos seus contrincantes. Non por nada, este é un club que ten unha media de 87,1 puntos por partido, sendo quen en moitas ocasións de vencer por máis de 40 puntos.
Cifras habituais ata este 2021, no que dous galegos da zona baixa, o Arxil e o Cortegada puxeron ao conxunto de López contra as cordas e precisaron sudar a camisola para gañar os dous puntos. Unha “mala racha”, se é que as universitarias a coñecen, que finaliza co encontro ante o Miralvalle.
O mal inicio non determinou o partido
O BAXI Ferrol non saíu na súa mellor forma ao parqué da Malata. Uns primeiros minutos complicados fixeron que as extremeñas poidesen demostrar o seu bo xogo e foran quen de plantarlle cara ás líderes da LF2.
A un minuto do final do primeiro cuarto, as visitantes lograban unha vantaxe de catro puntos, pero un triple de Patri Cabrera marcou o inicio dun cambio de ritmo no duelo.
Para o segundo tempo, as locais xa se fixeron co partido, comezando a remontada e logrando unha vantaxe sobre o rival que xa non soltarían. A defensa en zona visitante non impediu o ataque galego, que tivo especial acerto desde a liña exterior con catro triples seguidos de Cabrera.
Un parcial 22-4, tras o acerto de Benet, Swart e Cabrera, deixaba xa claro quen eran as donas da pista ferrolá, mentres os puntos non paraban de aumentar no casilleiro local. Así, o electrónico marcaba o 44-29 na metade do duelo.
O descanso non foi suficiente para as extremeñas, para as que as súas escasas rotacións fixéronlle acusar o cansancio na segunda parte do partido, sen poder aguantar a presión local.
Parcial de 21-1 para as ferrolás
O terceiro cuarto serviu para que o BAXI seguise aumentando a súa vantaxe. A cinco minutos da reanundación, as galegas xa se ían de trinta puntos fronte ás súas rivais, con grandes actuacións como as de Gari, con dous triples e tres canastras seguidas. Un parcial 21-1 poñía o marcador a 65-30, deixando poucas posibilidades para a vitoria visitante.
O último tempo seguiu unha tónica similar, aínda que o Miralvalle non deixaba de loitar por cada balón, deixándoo todo na pista. Con todo, a defensa do equipo universitario era superior, quitándolle calquera opción as ofensivas rivais. Un cuarto de 25-9 remataba o partido, no que o BAXI fixo, de novo, o que quixo co seu contrincante.
Un resultado final de 92-43 que devolve a confianza plena do plantel ferrolán no seu xogo e na súa calidade, despois dun inicio de ano no que, malia non perder, non atopaban o seu característico xogo demoledor.
16 de enero. 16-0.#DISFRUTARdelCAMINO #LF2 pic.twitter.com/KXPzdgLXg5
— Baxi Ferrol (@UniFerrol) January 16, 2021
FICHA TÉCNICA
92) BAXI FERROL: Fernánez (2), Garí (23), Mungo (9), Leaupepe (11) e Swart (14) -cinco inicial-. Tamén xogaron: Cabrera (17), Benet (5), Rodríguez (5), Aijanen (5) e Boquete (6)
43) EXTREMADURA MIRALVALLE PLASENCIA: Ainsa (5), Robertson (7), Morales (4), Weledji (8) e Aghayere (17) -cinco inicial-. Tamén xogaron: Cueva (2), Pizarro (-) e Rodríguez (-)
PARCIAIS: 17-18; 27-11; 23-5; 25-9
ÁRBITROS: Romina Marchiano e Daniel López
INCIDENCIAS: Partido correspondente á 16ª xornada da Liga Feminina 2 disputado en A Malata (Ferrol).
