O BAXI Ferrol segue medrando na LF Endesa, pero para conseguir a ansiada vitoria precisa a axuda da súa afección. O vindeiro sábado, 15 de xaneiro, as universitarias teñen unha cita na Malata ante o Innova Leganés, nun duelo vital en busca do quinto triunfo.
Desta forma, o club departamental lanza as entradas bonificadas. Todas aquelas persoas aboadas poden axudar a outras a conseguir entradas a prezos reducidos, pagando só 5 euros os adultos e 2 euros as nenas e nenos de entre 6 e 17 anos. Os menores de 6 poderán conseguir unha invitación de balde.
Ademais, segundo apunta o BAXI Ferrol, o público xeral tamén terá entradas cun prezo inferior ao habitual, quedando a oito euros para os maiores de 18 anos e a catro para a rapazada de 6 a 17 anos.
As entradas poderán adquirirse no Bar Sur, na rúa Magdalena 50, sede da peña Ruxidos de Esteiro. O horario de apertura é de 12:00 a 15:00 horas e de 19:00 a 22:30 horas. É preciso achegar o carné de aboado.
A través desta iniciativa, o BAXI quere atraer á afección e crear un gran ambiente na Malata para que o equipo se sinta arroupado nun encontro determinante para o seu futuro.
Debido ás actuais restriccións sanitarias, o club recorda que para entrar no pavillón será necesario presentar o certificado de vacinación, nuha PCR realizada nas últimas 72 horas ou un test de antíxenos realizado nas últimas 48 horas.
