O Club Basketmi Ferrol poderá adestrar nas pistas coruñesas de Novo Mesoiro. Tras un acordo entre o Concello da Coruña e o equipo ferrolán, o conxunto de baloncesto en cadeira de rodas poderá dispoñer das instalacións deportivas municipais.
Esta mesma semana, oito integrantes do equipo, entre os que se atopa a xogadora Lore Bermúdez, xa levou a cabo a primeira sesión de traballo nas pistas.
O Concello da Coruña, seguindo a liña de promoción da práctica deportiva adaptada marcada polo Goberno de Inés Rey, facilitou que a entidade dispoña de instalacións municipais para adestrar cada luns en horario matinal, axudando a ampliar a difusión do deporte adaptado na cidade.
Neste sentido, a concelleira de Deportes, Mónica Martínez, apuntou que, coa posta a disposición do pavillón de Novo Mesoiro para este proxecto, “a idea tamén é que os cidadáns interesados podan probar e animarse a facer deporte”. “O sedentarismo é un problema xeral, sobre todo tras a pandemia, pero afecta moito ás persoas con discapacidade. Queremos que a través desta escola, con técnicos cualificados e con experiencia, adquiran a condición física e os aspectos técnico-tácticos necesarios para practicar este deporte”, agregou Martínez, que visitou o primeiro adestramento esta mañá, apuntan desde o goberno local.
O obxectivo: consolidar unha escola que leve a conformar un equipo de competición
O presidente do Club Basketmi Ferrol, Álvaro Illobre, sinalou que a entidade, que impulsa a competición en baloncesto en cadeira de rodas desde o ano 1990, busca brindar a oportunidad de practicar deporte a persoas con diversidade de toda Galicia, tamén a impulsar a carreira dos futuros novos valores na disciplina.
Álvaro Illobre: “O proxecto é consolidar unha escola forte“
“O proxecto é consolidar unha escola forte que poda levar a que un equipo compita aquí, na cidade, en dous ou tres anos”, detallou o presidente do Basketmi. Polo momento, un total de oito deportistas, catro deles veciños da Coruña, pero tamén outros que residen Carballo e Ferrol, xa comezaron os seus adestramentos no pavillón de Novo Mesoiro.
“Está pensado para persoas con discapacidade física motora”, sinalou Illobre, que abriu as portas a todos aqueles interesados en adestrarse co Basketmi na cidade da Coruña, coa Concellaría de Deportes e a propia entidade como vías de contacto dispoñibles.
