A Federación Ciclismo Galego (FCG) propón desde hoxe, domingo 2 de abril, ao martes 4 vai ter lugar no Hotel Cemar de Mondariz Balneario a segunda edición do Campus XCO (Cross Country Olímpico) Ciclismo Galego.
Esta proposta de diversión e formación ligada ao Cross Country Olímpico está dirixida a ciclistas federado/as e que naceran entre os anos 2007-2011 (alevíns de 2º ano, infantís e cadetes). O programa deseñado segue a liña do que se realizou o ano pasado na primeira edición. Daquela fixérase en Pontevedra e resultara todo un éxito.
Durante tres días a bicicleta será a gran protagonista na contorna do Hotel Cemar, nos concellos de Mondariz e Ponteareas.
As sesións de BTT XCO (Cross Country Olímpico), unha delas nunha pista de Pump Track, compleméntanse con charlas. Á primeira, o domingo ás 10:30 horas, tamén poden asistir os pais aproveitando a apertura do Campus. Titúlase ‘Como axudar a que o meu fillo desfrute máis do ciclismo’ e encargarase de impartila o psicólogo deportivo Jorge Carril (Deportivamentes).
Os seus coñecementos sobre a mecánica compartiraos Pablo Alfaya (Bicimecánica Porto), de estiramentos e adestramentos aprenderase da man de Emilio de la Campa (fisioterapeuta da selección española de BTT e con experiencia en equipos como o MMR) e a formación técnica correrá a cargo do seleccionador autonómico Alberto del Río, a súa vez director do Campus. Ademais, hai previstas actividades especiais como paintball e karaoke.
