O Ulla Oil Rosalía adestrado por Chiqui Barros está atascado na zona baixa da clasificación e precisa unha vitoria para escapar dos últimos postos. O seu rival nesta décimo sexta xornada da Liga Feminina 2 será o GDKO Ibaizabal, un equipo a priori superior pero ao que lle plantarán cara. A cita será este sábado, 16 de xaneiro, ás 17:00 horas no Instituto Rosalía.
“Un partido importante, nun mes de xaneiro complicado porque se xuntan exames cunha serie de partidos onde temos que dar o mellor nivel posible para intentar chegar ao tramo final coa permanencia consolidada”, recorda Chiqui Barros.
Barros: “Xúntanse exames cunha serie de partidos onde temos que dar o mellor nivel posible para chegar ao tramo final coa permanencia consolidada”
A traxectoria ascendente que viviron as xogadoras estase a ver freada por unha serie de derrotas nas que, malia competir ben, as novatas na LF2 non logran impoñerse aos seus contrincantes. O último exemplo foi a derrota ante o Celta Zorka Recalvi.
Aínda queda marxe para que o Rosalía logre a permanencia
Despois de catorce partidos, o Rosalía soamente logrou gañar tres, polo que suma 17 puntos e ocupa a penúltima posición da clasificación. Con todo, a segunda máxima categoría do baloncesto español está moi disputada.
Unha vitoria (se Arxil e Cortegada non gañan) faríalles ascender dous postos e estar moi preto de equipos como Maristas Coruña, ADBA ou o propio Ibaizabal. A falta de 12 partidos por xogar, as compostelás están a nove puntos do terceiro clasificado.
Pola súa banda, o GDKO Ibaizabal chega da súa terceira derrota consecutiva, desta vez ante outro vasco, o HGB Ausarta Barakaldo. As xogadoras de Berrocal mantéñense na oitava posición, con seis vitorias e oito derrotas e máis de 800 tantos anotados.
Un rival “que seguro que ven moi obrigado a ganar porque necesitan vitorias para compensar a primeira volta, na que entendo que estiveron por debaixo das súas posibilidades”, analiza Barros.
Segundo o adestrador branco, as vascas teñen un plantel “extraordinario”, con “xogadoras excepcionais como Juana Molina“, que conforman un “equipo moi poderoso e de moito nivel”.
Barros: “Estamos convencidas de que llo imos poñer moi difícil”
Un rival complicado, pero non imposible. Chiqui Barros confía en que o factor casa acompañe e declara que “estamos convencidas de que llo imos poñer moi difícil”.
Por iso, a 23 do Rosalía, Nerea Liste, asegura que no equipo son conscientes de que “vai ser un partido que require a mellor versión do nostro equipo”. A ida escapóuselles, xa que “era o segundo da LF2 e aínda tiñamos que coller dinámica”, pero agora “estamos nun dos mellores momentos da tempada”.
Nerea Liste: “Vai ser un partido que require a mellor versión do nostro equipo”
Para esta xornada, Barros non poderá contar coa súa 13. Alba Rama ven de ser operada dunha lesión no tendón de Aquiles e estará durante unha tempada de baixa. O club aínda non anunciou cal será o seu período de recuperación.
A súa compañeira, Nerea Liste, mandoulle unha mensaxe de apoio na rolda de prensa, desexando que Rama “pronto poida volver aos pavillóns e estar con nós”.
