O Dépor ABANCA perdía unha ocasión de ouro para adxudicarse, novamente, o liderato da Primera Federación da RFEF FutFem, pero non puido co filial do Barça B. As branquiazuis caeron derrotadas por un rotundo 0-3 en Abegondo, unha cancha que, habiltualmente, é un fortín para as galegas.
Das ocasións máis claras do Barça B nos minutos iniciais hai que citar unha ocasión de Laia Martret cun remate dentro de área que salvou sobre a liña Inés Altamira. O Dépor ABANCA tentou construír xogo ofensivo, pero sen demasiada claridade mentres que, nunha xogada con Martina Fernández como protagonista, o Barça B non perdoou para fusilar a Lucía e pór o 0-1 no marcador con máis de hora e cuarto por diante aínda.
O Dépor ABANCA probou por primeira vez a Meritxel Font nunha condución de Millene que acabou rematando raso ás mans da gardameta culé. Ari Arias tamén puxo a proba desde a frontal a Lucía que en dous tempos atallou o disparo afastado do equipo visitante.
O Barça B gañaba pola mínima ao descanso
Chegouse co 0-1 ao descanso e á volta de vestiarios, co cambio de Letti por Laura, o Dépor ABANCA pisou área rival pronto cunha xogada de Ainhoa que non puido culminar.
Pola contra, unha longa xogada de combinacións en ataque acabou cun centro desde a dereita que non tocaron nin as dianteiras blaugranas nin Inés Altamira pero que si atopou o pé de Samara que empuxou o balón á súa propia portería para pór o 0-2 no marcador e aumentar a dificultade da remontada con 40 minutos por diante.
Non desistiron As Nosas deportivistas que adestra Irene Ferreras na procura do gol, pero coa mesma certeza que no resto do partido. Un remate de cabeza desviado de Cris Martínez e outra chegada de Millene desviada pola defensa a córner puxeron o punto final a un partido no que o Dépor ABANCA buscaba os tres puntos para asaltar o liderado, pero atopouse tres goles en contra para reforzar ao Barça B no máis alto da táboa na categoría de prata.
FICHA TÉCNICA
0) RC DEPORTIVO ABANCA: Lucía, Cris Martínez, Inés Altamira, Raquel García, Samara (Monteagudo, min. 77), Paula Gutiérrez, Henar, Ainhoa Marín (Eva Dios, min. 85), Sara Navarro (Charle, min. 64), Laura Fernández (Letti, min. 46) e Millene.
3) FC BARCELONA B: Meritxel Font, Martina, Adriana Ranera (Alba Caño, min. 64), Noah Bezis (Berta Doltra, min. 79), Ariadna Mingueza, Julia Bartel, Giulia Dragoni (Lucía Corrales, min. 64), María Rabaza, Laia Martret, Judit Pujols e Ari Arias (Ari Sánchez, min. 85).
GOLES: 0-1 Martina (min. 13); 0-2 Samara (min. 50); 0-3 Lucía Corrales (min. 81).
EQUIPO ARBITRAL: Trujillano Gallardo (c. andaluz). Amoestou a Henar (min. 63) e Noah Bezi (min. 66).
INCIDENCIAS: Partido correspondente á 23ª xornada de Primera Federación Iberdrola da RFEF disputado na Cidade Deportiva de Abegondo ante uns 700 espectadores na bancada.
