O balonmán feminino galego recupera o seu derbi

O coronavirus privou ao mundo de moitas cousas no último ano e medio. Tamén da festa do balonmán galego. Un derbi entre Mecalia Atlético Guardés e Conservas Orbe Rubensa Porriño que non se disputou o curso pasado, ao celebrarse a liga nun formato de dous grupos debido á pandemia. Ambos os conxuntos foron separados na primeira fase da Liga Guerreras de balonmán e tampouco se viron as caras na segunda, xa que a escuadra miñota pasou á loita polo título e a do Louro á da permanencia.

Esta tempada rexistrarase moi pronto o retorno do derbi do balonmán galego en partido de Liga. De feito, será o primeiro encontro na Sangriña para o Guardés, que recibirá ao conxunto que adestra Isma Martínez na segunda xornada (18 de setembro).

Pero antes de entrar en fariña competitiva, toca seguir preparándose para chegar no mellor momento de forma posible á liña de saída o sábado 28/8/21 ás 19:00 horas, os dous máximos representantes femininos do balonmán galego veranse as caras no Municipal de Porriño antes do partido de Supercopa Galicia do próximo domingo día 5 de setembro.

Unha tarde de reencontros para varias xogadoras, entre elas Estela Carrera, Anthía Espiñeira, Haridian Rodríguez ou Inés Hernández, con pasado na Sangriña. Será o cuarto encontro da pretemporada para o equipo de José Ignacio Prades, que superou a Aula Valladolid e Unicaja Gijón e perdeu con Bera Bera nos tres primeiros.

Os problemas físicos están a supoñer un importante contratempo para a folla de ruta do técnico alacantino nesta fase de preparación. Sandra Santiago e Deborah Hannah Nunes seguen de baixa e en proceso de recuperación dos seus respectivos golpes. Pero, ademais, varias xogadoras están a ter molestias e doenzas que, aínda que non lles impiden xogar, si limitan o seu desenvolvemento e a súa evolución.

Deste xeito, José Ignacio Prades volverá efectuar diversas probas no amigable contra o Conservas Orbe Rubensa Porriño. Como é obvio, porque as pretemporadas están para iso. Pero tamén para non cargar de minutos nin de sobreesforzos a varias das súas pupilas.

Será unha nova oportunidade para ver en acción a algunhas xogadoras xuvenís, especialmente unha Yaiza Alonso que causou unha gran impresión cando lle tocou participar, sobre todo en ataque, onde se move como peixe na auga sobre a liña de seis metros. Unha pivote de moito futuro.