Así vexo a consecución do balón de ouro por parte da futbolista española Alexia Putellas: histórico, merecido e un punto de inflexión.
Ver esta publicación en Instagram
Desde que o noso grandérrimo Luis Suárez acadara o balón de ouro aló polo polo ano 1960, ningún deportista español foi quen de repetir a xesta. Esta edición a blaugrana Alexia Putellas entra na historia do balompé español pola porta grande. O seu logro é, polo tanto, histórico.
Alexia, unha futbolista impresionante
Non é que o diga eu. E que os títulos, e os recoñecementos acumúlanse no palmarés da deportista catalá. Hai nada Alexia Putellas foi seleccionada como mellor xogadora da UEFA e como mellor centrocampista da Champions League.
A de Mollet del Vallès ten un guante no pé e a súa cabeza debuxa xogadas antes de que o balón nin chegue á súa bota. A súa mente traza liñas a ocos que ela sabe que están e aparecen para levar o esférico xusto onde unha compañeira continúa a xogada. É tan xenerosa no pase como ambiciosa no resultado final. Por iso, o seu fútbol triunfa no Barça, na Selección Española e aló onde a redonda a leve.
O Balón de Ouro é merecidísimo.
Un punto de inflexión
Ao fío da consecución deste premio Alexia ten feito diferentes declaracións das que querería salientar unha: “Todo o mundo ten dereito a soñar con ser futbolista”. Isto ata hai pouco, sendo muller era unha quimera. Non é que agora sexa doado, non. Pero a base do noso balompé xa ve como factible ser profesionais deste deporte, por que xa temos xogadoras que o son. Poucas, pero hainas.
Como referente Alexia Putellas é importantísima. O seu papel é crucial para permitirnos soñar. É un espello no que mirármonos todas non, so as máis novas. Ela é unha proba de que, sabido o traballo, a constancia, a calidade que aportan das mulleres do deporte, cando teñen apoios, son ouro puro, como ese balón que fai da capitá do Barça a mellor xogadora do mundo.
Ela e as súas compañeiras de vestiario están deixando claro que, cando se aposta por elas, cando se xuntan proxectos serios e cartos sobre a mesa, as deportistas do balón teñen moitísimo fútbol que dar. Este Balón de ouro debe ser polo tanto, un punto de inflexión para deixar claro que somos quen e que non hai marcha atrás na aposta polo futfem neste país.
Na lista de aspirantes ao Balón de Ouro quedaron outras futbolistas fantásticas como Jenni Hermoso, Irene Paredes ou Sandra Paños. Todas militan no mellor equipo da Liga Iberdrola (Campión de Copa e Liga) e de Europa neste momento (campión da Champions League), falo, por suposto, do FC Barcelona Femeni.
Esta é a relación das vinte futbolistas e como quedou a clasificación nesa loita polo Balón de Ouro 2021. Esquecer os seus nomes sería deixar a un lado outras moitas deportistas que tamén loitan por dignificar e facer valer o futfem:
- Alexia Putellas (Espagne, FC Barcelone), 186 points.
- Jennifer Hermoso (Espagne, FC Barcelone), 84 pts.
- Samantha Kerr (Australie, Chelsea), 46 pts
- Vivianne Miedema (Pays-Bas, Arsenal), 46 pts.
- Lieke Martens (Pays-Bas, FC Barcelone), 40 pts.
- Christine Sinclair (Canada, Thorns FC), 36 pts.
- Pernille Harder (Danemark, Chelsea), 33 pts.
- Ashley Lawrence (Canada, Paris-SG), 26 pts.
- Jessie Fleming (Canada, Chelsea), 25 pts.
- Francesca Kirby (Angleterre, Chelsea), 22 pts.
- Magdalena Eriksson (Suède, Chelsea), 20 pts.
- Christiane Endler (Chili, Paris-SG, Lyon), 19 pts.
- Stina Blackstenius (Suède, BK Häcken), 10 pts.
- Samantha Mewis (États-Unis, Manchester City), 8 pts.
- Irene Paredes (Espagne, Paris-SG, FC Barcelone), 8 pts.
- Ellen White (Angleterre, Manchester City), 4 pts.
- Kadidiatou Diani (France, Paris-SG), 3 pts.
- Marie-Antoinette Katoto (France, Paris-SG), 3 pts.
- Sandra Paños (Espagne, FC Barcelone), 3 pts.
- Wendie Renard (France, Lyon), 2 pts.
Ver esta publicación en Instagram
Por certo, non deixa de ser curioso que ambos os dous futbolistas españois que acadaron o premio da revista francesa France Football, o galego e a catalá, o fixeran vestindo a elástica blaugrana. Non vos parece?
Ogallá algún día Galicia sume outro balón de ouro que acompañe no palmarés galaico ao de Luis Suárez. E que bonito sería que fose dunha futbolista!
Pódese. Puidose desde Mollet del Vallès e poderase desde outros lugares. Por que non se vai poder desde Friol, desde Portonovo, Mos, Compostela, A Coruña, Vigo ou mesmo desde Ribadumia?
