O Dépor ABANCA saltaba ao tepe da Cidade Deportiva de Abegondo xusto de efectivos por mor das baixas e iso rematou por pasarlle factura. Enfronte tiña a un CDE Racing Féminas que, por riba, atopouse cun gol madrugador que puxo as cántabras por diante.
Quecemento rematado! Ás 12:00 h., en #Abegondo, #DéporABANCARacingFéminas na 21ª xornada de #RetoIberdrola
🦋 #VoemosXuntas 💙 #MoitoPorVivir pic.twitter.com/UGYVlKap56
— RC Deportivo (@RCDeportivo) March 19, 2022
So 13 xogadoras do primeiro equipo puido convocar Miguel Llorente para recibir ao club santanderino. Así, xustas de efectivos, estaba as branquiazuis dispostas a facerlle frente ao CDE Racing Féminas, cando un gol no minuto 4 de partido modificaba todo o guión. As cántabras replegáronse, defenderon a súa meta como se fose un fortín, e remataron por levar no peto os tres puntos en xogo.
Ese primeiro gol asinábao Laura Camiño que picaba a pelota, soa ante Ana Valles. A ocasión xurdía por un pase da propia cancerbeira cara a Carlota que interceptaba a futbolista visitante.
O control do choque foi deportivista, pero o CDE Racing Féminas era quen de conter os intentos das galegas. Eva Dios, como dianteira, levou perigo pero non foi quen de perforar a meta defendida por Lucía Alba. A xogada para a polémica chegaría no minuto 19 cun posible penalti da gardameta á dianteira deportivista. A acción quedou sen castigo.
O segundo gol chegou no minuto 24 cun tanto froito dun contragolpe con centro de Andrea Totana cara ao segundo pau, alí agardaba Elexa Bahr. A futbolista controlaba o esférico e soltaba un zurdazo cruzado ao poste contrario ante o que nada puido facer a porteira do Dépor ABANCA Ana Valles.
Tivo o Dépor ABANCA ocasións, ademais do control do balón e do partido, pero nada diso deu como froito goles para que as branquiazuis puideran remontar o 0-2 adverso en cancha propia. Non houbo maneira tampouco na segunda metade. Houbo ocasións de Eva Dios, Laura Fernández e Ainhoa Marín.
Final do #DéporABANCARacingFéminas, 0-2
🦋 #VoemosXuntas 💙 #MoitoPorVivir pic.twitter.com/rWZjbSIPhQ
— RC Deportivo (@RCDeportivo) March 19, 2022
A seguinte saída do Dépor ABANCA, á cancha das líderes
Con este resultado, o Dépor ABANCA segue na zona alta da tabla clasificatoria da Liga Reto Iberdrola, pero coa losa de sumar xa tres derrotas e tres empates nos seis últimos partidos. Tanto animicamente como por resultados, o equipo que adestra Miguel Llorente precisa reencontrarse coa vitoria.
Mañá, domingo, empezan as deportivistas o traballo cara ao seguinte cruce ligueiro, será o domingo 27 ás 12:00 horas no campo do líder, o FC Levante Las Planas, en partido correspondente á 22ª xornada. Miguel Llorente citou ás xogadoras do Dépor ABANCA ás 11:30 horas en Abegondo para unha sesión de recuperación para as titulares ante o CDE Racing Féminas, e máis intensa para o resto das xogadoras branquiazuis.
O descanso semanal márcase para o luns 21.
O club coruñés vén de reforzarse cunha xogadora internacional ucraína que, debido á guerra, tivo que abandonar o seu país. Tratáse da extremo Viktoriia Hiryn coñecida futbolísticamente como Vika.
FICHA TÉCNICA
0) RC DEPORTIVO ABANCA: Ana Valles, Cris (Paula Monteagudo, min. 81), Inés Altamira, Raquel García, Patri López, Carlota, María Figueroa (Laura Fernández, min. 61), Ainhoa Marín, Jone Ibáñez, María Ruiz e Eva Dios (Aroa Guerra, min. 69).
2) CDE RACING FEMINAS: Lucía Alba, Andrea Totana, Marina Martín, Titay, Ali Ruiz (Carla, min. 70), Yuki Togawa (Laura Viñas, min. 79), Henar, Irene Campo, Elexa Bahr, Laura Camino e Ángeles (Paloma, min. 90).
GOLES: 0-1 Laura Camino (min. 4); 0-2 Elexa Bahr (min. 24).
ÁRBITRA: Selina Álvarez Branco do Colexio Galego de Árbitros. Expulsou ao adestrador deportivista Miguel Llorente (min. 68). Amosou cartón amarelo á futbolista Ainhoa Marín (min. 78) do Dépor ABANCA e a Andrea Totana (min. 90+1) do CDE Racing Féminas.
INCIDENCIAS: Partido correspondente á 21ª xornada do grupo Norte da Liga Reto Iberdrola disputado na Cidade Deportiva de Abegondo.
