O Pontevedra Rugby Club (PRC), novato na División de Honor B, aínda non coñece a vitoria, pero as súas melloras sobre o campo xa son tanxibles. Porén, esta fin de semana terán un reto maiúsculo, ao visitar ao actual líder da categoría, o Sant Cugat, o domingo, 14 de febreiro, ás 11:30 horas.
Este duelo, recuperación da xornada adiada contra as catalás, que levan un pleno de vitorias, será ante un rival moi duro para as Irmandiñas. Unha delas, Azucena Alonso, admite que no plantel galego son conscientes do alto nivel das contrincantes, polo que “na nosa cabeza temos presente que durante o partido tocará facer un forte traballo de defensa a maior parte do tempo”.
Azucena Alonso: “Tocará facer un forte traballo de defensa a maior parte do tempo”
Rubén Sanmartín, segundo adestrador do PRC, coincide coa súa pupila e apunta que o Sant Cugat será un rival “que cremos que en ataque vai ser moi agresivo. Imos cunha mentalidade moi defensiva, pero ao mesmo tempo de seguir progresando, seguir aumentando a nosa forma de xogo”.
Isto non amedrenta ás xogadoras do Pontevedra RC, e segundo Azucena, todo o conxunto ten “gañas de xogar cun equipo do seu nivel, tanto parra aprender como para crecer como equipo e non dubidamos en que daremos o mellor de nós”.
O último duelo, celebrado ante o XV Hortaleza RC, as Irmandiñas deixaron ver a súa mellor versión, o que “cargou as pilas” de todo o plantel.
A ilusión, unha constante no equipo galego
“A nivel persoal estou orgullosa de participar neste proxecto. Creo que todas estamos crecendo como xogadoras e estamos abrindo a nosa mente con novos equipos e novas visións do xogo”, declara Azucena.
Rubén Sanmartín: “Temos ganas de demostrar que debemos estar na Liga o ano que vén e que somos un equipo duro de roer”
O encontro ante o líder preséntase como todo un reto para o PRC, pero o segundo adestrador asegura que “encaramos este partido con moitas ganas, moita enexía e con ganas de demostrar que debemos estar na Liga o ano que vén e que somos un equipo duro de roer”.
A convocatoria do Pontevedra RC
Ademais, tal e como informa Sanmartín, esta partido será a oportunidade de debut ” dun par de rapazas novas que non entraran antes por motivo de convocatoria”.
Así, sobre o céspede catalán estarán:
- Antía Fraga
- Sara Antúnez
- Teresa Gálvez
- Patricia Lamas
- Aurora Redondo
- Laura López
- Valle Viñas
- Alba de la Fuente
- Carmen González
- Mónica García Kika
- Patricia Alonso
- Crisitna Ortigueira
- María Abel
- Azucena Alonso
- Coral Núñez
Ver esta publicación en Instagram
Se a COVID-19 non pode coas Irmandiñas, quen poderá?
Este partido tería que terse disputado na fin de semana do 23 de xaneiro, pero un positivo no plantel galego obrigou a adiar o encontro. Unha vez recuperadas, as Irmandiñas volveron con forza ao campo e foron quen incluso de anotar os seus primeiros ensaios e transformacións.
Malia non ter vencido, a xogadora Azucena Alonso considera que este partido xogado “en casa cun tempo moi galego”, foi moi útil para as galegas.
“Nótase o progreso. O traballo constante e progresivo demostrouse en que por fin chegamos a ensaiar e nunha mellor compenetración en defensa. Temos claro que temos moito camiño de mellora, posto que hai fallos e problemas”, declaraba.
Azucena: “O equipo en xeral, xogadoras, delegadas, staff técnico, directiva, etc estamos poñendo na parrilla ganas, ilusión e RUGBY!”
A propia Azucena foi a autora dalgún destes ensaios, unha xogadora que pensa en plural. “Considero que temos que dar un pasito máis, pero estamos na boa dirección. O equipo en xeral, xogadoras, delegadas, staff técnico, directiva, etc estamos poñendo na parrilla ganas, ilusión e RUGBY! Por tanto, nin o COVID parounos, así que… quen poderá? FORZA IRMANDIÑAS”, declara moi animada a compoñente do PRC.
O Pontevedra RC estrea marcador pero non logra a vitoria (12-36)
