Igualdade máxima a que se viviu no pavillón polideportivo do Barrio das Flores da Coruña esta fin de semana. O CV Autos Cancela Zalaeta conseguía un loitadísimo triunfo ante o Fedes Ascensores La Laguna no quinto set, un xogo no que as coruñesas chegaron a ir cinco puntos por debaixo pero que lograron remontar ata conseguir o levarse o partido nese tie-break.
SF2 🏐
Tras un partido de infarto… a vitoria queda no fortín!💥As do Instituto conseguen 2 puntos importantísimos que as fai seguir soñando con estar no máis alto da táboa 💪🏼
A seguir remando rapazas, esto solo acaba de comezar 🔥 pic.twitter.com/PkPZzqlrK3
— Voleibol Zalaeta (@CVZalaeta) October 23, 2022
Tres xornadas, e tres triunfos colleitados. A serie do CV Autos Cancela Zalaeta parece non ter final. A súa vitoria desta fin de semana na Superliga Feminina 2 (SLF2) ante o Fedes Ascensores La Laguna foi tremendamente loitada.
Empezou o partido por diante o conxunto isleño que se levaba o primeiro set cun tanteo de 27-29. A segunda manga foi para as xogadoras que adestra Jorge Barrero que cun 25-22 colocaban o encontro 1-1.
De novo no terceiro set, mazazo para as herculinas. As canarias adxudicábanse o 1-2 cun 20-25. Xusto ese tanteo pero ao reves (25-20) puxo o 2-2 no electrónico do pavillón do Barrio das Flores e levou ao CV Autos Cancela Zalaeta e ao Fedes Ascensores La Laguna CV Aguere a loitar polo triunfo no tie-break.
O Zalaeta remonta no quinto set e leva o partido
Ese quinto e definitivo set estivo tan disputado e con tantas alternacias como tiña sido o partido ata o momento. Para levar o triunfo final, as galegas tiveron que remontar un marcador adverso no que estaban cinco puntos por debaixo. Un punto directo das locais outorgoulle o triunfo ás coruñesas por 17-15.
Logo da disputa desta terceira xornada o CV Autos Cancela Zalaeta ocupa a terceira praza na táboa clasificatoria da Superliga Femenina 2 (SLF2) con oito puntos no seu haber, unicamente superado polo RCG Covadonga e o Extramadura Arroyo, ambos os dous cun punto máis cas coruñesas. As galegas teñen dous puntos de vantaxe co cvleganes.com e o Santa Cruz Cuesta Piedra que son cuarto e quinto, respectivamente, ambos os dous con seis puntos.
Xustamente na vindeira xornada o Autos Cancela Zalaeta viaxa a medirse ao cvleganés.com no Pabellón Europa, será o domingo 30 de outubro a partir das 13:00 horas.
FICHA TÉCNICA:
3) CV AUTOS CANCELA ZALETA: Sara Urrea (20), Eleonora Guzzi (11), Cecilia Thon (3), Emma Ordóñez (17), Inés Rivas (12) e Alba Quirós (20). Noa Domíngez (líbero) – equipo inicial -. Tamén xogaron: Patri Santos (-), Laura Vázquez (1), Andrea Rivas (2) e Claudia Gómez (2).
2) FEDES ASCENSORES LA LAGUNA: Juliana Antunes (5), Natalia Binimelis (2), Carolina Fernández (15), Omaira Perdoma, Sara Hernández (3) e Aylin Pereyna (28). Sheyla Gómez (-) (líbero) – equipo inicial -. Tamén xogaron: Sara González (-) (líbero), Selena Gómez (1), Naira Acosta (-) e Ainoa Vargas (-).
PARCIAIS: 27-29 (29 min.), 25-22 (28 min.), 20-25 (26 min.), 25-20 (24 min.) e 17-15 (18 min.).
EQUIPO ARBITRAL: Francisco Barrallo Busto.
INCIDENCIAS: Partido da terceira xornada da Superliga Femenina 2 de voleibol disputado no pavillón polideportivo do Barrio das Flores da Coruña.
