As habilidades psicolóxicas a traballar coas deportistas poden depender de se se trata dun deporte individual ou en grupo, así como dos casos en concreto. Sen embargo, Madó González sinala que hai aspectos fundamentais e comúns para todos os deportes. Nesa relación, cita cuestións como “autoconfianza, control da activación, atención/concentración e motivación son aspectos importantes”, de cara a estar en plenas condicións á hora de competir.
– As Nosas: Poderías destacar catro puntos xerais que deberían estar en perfecto estado para que a deportista poida competir en condicións plenas a nivel psicolóxico?
– Madó González: Para min unha das máis importantes sería ter unha boa autoconfianza: confiar nas túas posibilidades é un factor fundamental para mellorar o rendemento.
Despois outro pode ser a atención/concentración, sobre todo nalgúns deportes de maior precisión.
A ansiedade, o control de activación que diríamos desde a psicoloxía, é outra das variables fundamentais.
Tamén é moi importante a motivación.
– As Nosas: Adestradoras, árbitras, técnicos… esas figuras tamén precisan dese apoio psicolóxico para poder estar en plenas capacidades?
– Madó González: Por suposto. Normalmente ten máis visibilidade a psicoloxía do deporte no caso das deportistas e dos deportistas pero é evidente que as adestradoras e adestradores precisan de facer adestramento mental e o mesmo no caso dos árbitros e dos xuíces. Por exemplo, no caso das árbitros paréceme fundamental a toma de decisións, porque teñen que analizar moi rapidamente a situación que teñen que avaliar. Outro pode ser a concentración, porque tamén deben estar moi centradas nos partidos e nas xogadas.
