O Concello da Coruña programa novas actividades no marco da Escola de Benestar e Apoderamento. Unha iniciativa que ten como obxectivo favorecer o apoderamento tanto individual como colectivo das mulleres para contribuir á transformación social. Esta semana comezan as sesións “Activa o corpo. Autocoidado a través do adestramento físico”, con prazas dispoñibles ata completar as prazas.
Os obradoiros “Activa o corpo. Autocoidado a través do adestramento físico” serán impartidos por Fátima Campaña, graduada en ciencias da actividade física e do deporte e docente e especialista en biomecánica. O obxectivo é chegar ao apoderamento a través do exercicio físico, traballando a capacidade de autoxestión e autodeterminación a través de recursos para mellorar o autocoñecemento e apoderamento mediante a toma de conciencia do propio corpo.
Terán lugar dous obradoiros, un en quenda de mañá (de 11.30 a 13.30 h) e outro en quenda de tarde (de 17.00 a 19.00 h), que comezan este venres 14 de abril de 2023. Están dirixidos a nenas e mulleres de 12 anos en diante e imapartiranse no Centro de Información á Muller (CIM), na rúa Hortensias, nº11. A este obradoiro súmanse cursos de autodefensa, Internet, apps e redes e comunicación feminista que comezaron o pasado mes de marzo dentro do marco da Escola de Benestar e Apoderamento do Concello da Coruña.
Aínda quedan prazas dispoñibles, polo que as persoas que o desexen poden realizar a súa inscrición a través do formulario na web da Escola de Benestar e Apoderamento. As prazas asignaranse por orde de inscrición ata completar a capacidade; todas as actividades son de balde.