- As galegas do Guardés acusaron un atasco no seu xogo na primeira parte, encaixando dous goles en quince minutos, foi un lastre que as da Guarda salvaron con solvencia no segundo acto no que amosaron moi boa actitude.
- Neste partido de pretemporada houbo probas, repartición de minutos e debut das fichaxes: Rajnohová, Arcos, Sempere e Moreno
Cinco meses e uns días despois do último partido oficial da tempada 2019-2020, o Atlético Guardés reencontrouse esta tarde en Villacelama (León) coa adrenalina do xogo. Tamén o fixo coa vitoria ao gañar á Aula Alimentos de Valladolid (31-21, 12-13 descanso) no primeiro test dunha pretemporada marcada pola imposibilidade de disputar partidos de preparación en Galicia.
O equipo de Prades apúntase desta maneira a primeira muesca na súa particular rivalidade co conxunto valisoletano, con quen volverá medirse o 29 deste mes en Valladolid e o 3 de setembro nos cuartos de final da Copa de SM a Raíña en Alhaurín de la Torre.
Patrícia Lima no central, Santiago no lateral esquerdo, Paulina Pérez no dereito, Lorena Pérez no extremo esquerdo, Daniela Moreno no dereito, Carla Gómez no pivote e Marisol Carratú foron as elixidas polo corpo técnico para o sete inicial da ansiada volta ás pistas.
Os primeiros minutos estiveron marcados pola igualdade (1-1, 2-2, 3-3, 4-4, 5-5, 6-6, 7-7) e un ritmo rápido con accións veloces por parte tamén do equipo comandado por Tere Álvarez. Ao sete inicial foron dando relevo Arcos, Erika Rajnohová no central e Sarah Valero no pivote. Aos poucos minutos chegaría o debut de Míriam Sempere baixo paus. A imposibilidade de contar na tarde de hoxe coas extremos Laura Morais e Rosario Urban obrigou ao técnico guardés a colocar a Buforn no extremo dereito.
Chegaron os minutos de incerteza para o Guardés, bloqueo no lanzamento con varios sete metros detidos por Lulú Guerra e a Aula coas ideas claras comezou a pisar o acelerador (7-10, TM de Prades). A pesar de que de maneira especial Sandra Santiago tiraba do carro, o Guardés se nublaba e as de Peñas facían a goma até o 8-13 deixando ás galegas co pobre rexistro de dous goles en quince minutos.
O rexurdir do Guardés
E apareceu Sarah Valero no pivote para desatascar de maneira maxistral e sumar 8 goles en todo o partido. Con dous goles da hispano-francesa, outro dunha sensacional Paula Arcos e outro de Moreno recortáronse distancias até o 12-13 que pechou a primeira parte. Houbo que remar ao contraxeito (16-16, 18-18) pero cando conseguiu desatarse o Guardés pasou en modo rodete por encima dunha Aula que foi incapaz de reaccionar (21-18, 26-19, 31-21 final).
Sesenta minutos de preparación que deixaron rotacións, probas en distintos sistemas defensivos (6:0 ou 5:1 con Arcos como referencia) e boas sensacións no primeiro amigable xogado polas galegas.
FICHA TÉCNICA
Club Balonmán Atlético Guardés (12+19) 31: Marisol Carratú, Míriam Sempere, Carla Gómez, Sarah valero (8), Lorena Pérez, Cris Barbosa, Daniela Moreno (4), Sandra Santiago (6), Patrícia Lima (3), Paula Arcos (3), Paulina Pérez (5), Erika Rajnohová (1), Estefanía Descalzo (1).
Aula Alimentos de Valladolid (13+8) 21: Carmen Sanz, Elba Álvarez, Jimena Lagoa (3), Claudia Álvarez, Daniela so Delgado (5), Parra (1), Ángela Neto (2), Lulú Guerra, Cris Cifuentes, Lorena Téllez (2), Mireia Dez, Fátima Koudia, Tere Álvarez (1), Sara Molés (1), Yunis Camejo, Elena Cadrado (2).
Marcador cada 5′: 2-3, 6-6, 7-7, 7-9, 8-12, 12-13 (descanso), 15-16, 19-18, 21-18, 24-19, 29-21, 31-21 (final).
Árbitros: Fernando Lozano e Desirée González. Excluíron por parte do Guardés a Pérez, Santiago e Rajnohová e da aula a Elba Álvarez, Camejo e Cadrado (2).
Incidencias: Partido amigable disputado no Polideportivo de Villacelama (León) con público.
