O Atlético Guardés conclúe esta fin de semana a primeira volta da fase polo título da Liga Guerreras Iberdrola. O duelo desta xornada será o sábado, 24 de abril, ás 19:00 horas na pista do Liberbank Gijón.
“A dificultade sempre aumenta fóra de casa”, advertiu o adestrador do cadro galego, José I. Prades. Este partido inicia un maratón de tres encontros nunha semana despois do parón de seleccións. O Atlético Guardés xogará a domicilio en todos eles, enfrontándose ao Rocasa Gran Canaria o mércores 28, recuperando o partido adiado, e ao Elche o sábado 1.
O Guardés non pode confiarse ante o colista
As asturianas son as colistas do grupo, sumando até o momento só dous puntos. Porén, este tipo de encontros poden ser traicioneiros, polo que as xogadoras que adestra José Ignacio Prades non se poden confiar. “Estánse a dar resultados moi parellos, que falan da igualdade que hai neste grupo”, sinala o adestrador do conxunto galego.
José I. Prades: “Estánse a dar resultados moi parellos, que falan da igualdade que hai neste grupo”
Malia ocupar a última posición e non poder dispor da xogadora lalinense Cecilia Cacheda, xa que está lesionada, o Liberbank Gijón é un rival moi a ter en conta. Natalia Martínez e Aída Palicio asumiron a responsabilidade que tiña a central do Deza no apartado goleador e a dirección. Ás súas achegas súmaselle a axuda da incombustible Marizza Faría, unha deportistas que é vella coñecida de José Ignacio Prades no Elda e no Elche.
Outro argumento a favor das xogadoras asturianas é a enorme valía da súa gardameta. Trátase da veterana Raquel Álvarez e a ex xogadora do Balonmano Atlético Guardés, Meriem Ezbida. Ademais, hai que ter presente o factor cancha. A escuadra do Liberbank xogará como local, e o técnico do club galego engade que “entendo que na súa casa porá toda a carne no asador para sacar os puntos”.
O parón internacional é un hándicap tamén para o equipo galego. “Foi unha semana un tanto complexa co parón de seleccións, pero temos o foco posto en que é un partido moi importante para nós”, subliña o adestrador José Ignácio Prades.
Sigue aquí vía streaming o partido desta xornada:
Prades ten plena dispoñibilidade de xogadoras para asegurar a terceira praza
O técnico do Atlético Guardés terá a todo o plantel ao completo á súa disposición para este cruce. Con todo, as internacionais portuguesas Patrícia Lima e Sandra Santiago e a eslovaca Erika Rajnohova só puideron adestrar na sesión do venres e veñen de competir coas súas seleccións o mércores. Contar con xogadoras internacionais ten a favor o seu gran nivel, e como contra o feito de que son requeridas regularmente para adestrar ou competir por parte dos seus combinados estatais.
As galegas da Guarda buscarán a vitoria neste partido co Liberbank Gijón para afianzar a súa terceira posición, co Málaga a só un punto, e preparar o partido ante o Rocasa para disputarlle a segunda praza ás canarias.
Máis aló disto, o principal obxectivo neste momento para o Atlético Guardés é rematar en postos que outorguen a clasificación europea. De logralo, sería a novena ocasión consecutiva para o club do Baixo Miño.
José I. Prades: “Ven unha semana na que se somos capaces de sumar puntos, achegarémonos un pouco máis ao obxectivo de conseguir a praza europea”
Vencer ante o Liberbank Gijón sería tamén un impulso para que o equipo afronte a súa apretada axenda. “Ven unha semana na que se somos capaces de sumar puntos, achegarémonos un pouco máis ao obxectivo de conseguir a praza europea”, explica Prades, quen ven de renovar para unha tempada máis co Guardés.
José I. Prades: “O obxectivo para a próxima tempada é facer un equipo o máis competitivo posible”
