- O Mecalia Atlético Guardés e o Conservas Orbe Zendal BM Porriño medíronse o pasado domingo nun encontro que se decantou a favor das guardesas (21-25).
Venceron cunha renda de catro goles, despois de liderar con maior vantaxe dende finais da primeira metade. Lorena Téllez foi protagonista con oito goles, sendo a máis destacada xunto coa gardameta Amandine Balzinc, que acadou 18 paradas e freou ao Porriño en momentos cruciais.
O Mecalia Atlético Guardés volveu demostrar a súa forza, esta vez na pista do Conservas Orbe Zendal BM Porriño. As xogadoras adestradas por Ana Seabra fixéronse o pasado domingo co derbi galego da Liga Guerreras Iberdrola diante do Porriño. Venceron as da Guarda tras unha gran actuación en ataque e defensa, grazas á que lideraron dende finais da primeira metade. As 18 paradas de Amandine Balzinc foron cruciais para o resultado, así como os oito goles de Lorena Téllez.
O equipo non deixou de loitar en conxunto ata o final, para culminar cunha vantaxe de catro goles un encontro que viñan dominando con diferenzas maiores durante todo o segundo período. O partido inaugurouse cun acerto de Lorena Téllez, que culminou a primeira xogada.
O Conservas Orbe Zendal BM Porriño respondeu de inmediato, da man de Paulina Buforn dende os sete metros. Xa nos instantes iniciais, ambos conxuntos amosaron un ritmo alto e igualado, apertando ao máximo para tentar forzar erros do rival. Ao termo do primeiro parcial, o marcador estaba en táboas (3-3, min. 5).
A forte defensa local obrigaba ao Mecalia Atlético Guardés a arriscar no pase e a forzar o lanzamento nalgúns momentos, rozando o pasivo noutros, e botando en falta unha mellor coordinación no ataque que lles permitise chegar con máis claridade á portería rival. Pero no outro lado, as de Ana Seabra igualaban en intensidade e ofrecían unha defensa igualmente férrea, que xa provocara varios paus consecutivos das do Louriña.
Un parcial 0-2 pareceu, pouco a pouco, amosar a superioridade visitante e comezar a marcar o ton do encontro (3-5, min. 10). Porén, non sería tan sinxelo. As xogadoras do Conservas Orbe Zendal BM Porriño chegaban dispostas a facer correr ás súas rivais, e o ritmo de xogo incrementouse aínda máis, se cabe. As mesmas imprecisións ofensivas permitiron a Carolina Bono roubar o esférico e reducir ao mínimo a renda guardesa de novo, e o Conservas Orbe Zendal BM Porriño incrementou os esforzos para desprazar o xogo á área miñota durante varios minutos.
Ao Mecalia Atlético Guardés só o salvaba nese intre Amandine Balzinc, que encadeou tres paradas decisivas, aínda que a tensión acabou por romper a corda e, superado o ecuador da primeira metade, volvían as táboas (6-6, min. 15).
Os nervios seguían á flor de pel no municipal do Porriño. A igualdade era máxima, co conxunto local tentando marcar o ritmo, pero atopándose de fronte cun Mecalia Atlético Guardés que non desistía. Unha parada máis de Balzinc, desta volta a un penalti de Buforn, ameazaba con ser un punto de inflexión para decantar o encontro.
Elena Martínez entrou entón na pista e volveu poñer ás súas por diante, acompañada pouco despois por unha Rosane Serrano que non fallou dende os sete metros (7-9, min. 21). O Mecalia Atlético Guardés podía controlar o vento a favor sumando esforzos. E así pareceu ser, pois por primeira vez, o conxunto local non puido reducir a diferenza (8-10, min. 25).
A pesar dun tempo morto solicitado entón por Isma Martínez, as súas xogadoras non atoparon o ritmo nin lograron aproveitarse das imprecisións que aínda mostraba un Mecalia Atlético Guardés cun ataque algo máis afinado. Un acerto de Ariana Portillo dende o extremo iniciaba o camiño, e María Sancha conseguía escapar cun balón roubado, levando a vantaxe aos máximos (8-12, min. 29).
Ana Seabra solicitou entón parar o reloxo para planificar o último minuto, e a precisión portuguesa volveu ofrecer unha exhibición excelente. A mesma Portillo culminou un ataque que funcionou coma un reloxo e completou a tarefa, deixando desarmado ao Porriño, que xa non tivo tempo para facer moito máis. A primeira metade pechábase coa enésima parada de Amandine Balzinc e confirmaba unha diferenza de cinco goles que ninguén agardaba ao inicio do encontro (8-13, min. 30).
O reinicio amosou o mesmo panorama, iniciado por Serrano de novo desde os sete metros e continuado por unha Lorena Téllez que culminaba un parcial 0-2 (ou 0-6, contando desde antes do descanso), grazas ao cal o equipo miñoto seguía afastándose. Pero se o Mecalia Atlético Guardés mantiña o ritmo, o Porriño conseuía melloralo, e a base de insistir, Paulina Buforn marcou o primeiro gol para as súas en máis de dez minutos. Non foi a única, pois as anfitrioas, impulsadas por unha formación de ataque a 7, víanse agora con máis capacidade de resposta e comezaban a levar o partido a un terreo máis equilibrado (11-16, min. 37).
O Guardés mantivo o ritmo ante o Porriño na segunda parte
As xogadoras adestradas por Ana Seabra debían manter o tipo para que non caera en saco roto o traballo da primeira metade. O ritmo rápido do encontro forzaba as imprecisións en ambos bandos, e as perdas de balón comezaban a ser frecuentes. As consecuencias eran frenadas por ambas gardametas, xa que tanto Amandine como agora tamén Ana Palomino impedían con creces que os goles se sucedesen. Con todo, o Guardés seguía perdendo algo de terreo (13-17, min. 42).
E, con todo, resistía. A ofensiva miñota non cesaba, a pesar dos erros, pois as fallas louriñesas comezaban a rozar o incontrolable da súa parte. Aínda que ambos conxuntos estaban máis igualados, o Mecalia valíase da diferenza lograda na primeira metade para seguir dominando (15-20, min. 46). Porén, a falta de dez minutos para o final, o encontro ameazou con virar o rumbo. Seabra solicitou o tempo morto para frear o que parecía ser unha subida local, pero xa non tivo o mesmo efecto.
Palomino detivo ata en tres ocasións os lanzamentos de Elena Martínez, e o Porriño comezou a aproveitarse das imprecisións do
que persistían, para encaixar un parcial 3-1 que non gustou nada á grada de O Inferno e apuntaba nunha dirección perigosa (18-21, min. 50). Pero a garra do Guardés mostrou que a súa baixada de ritmo fora un ilusoria.
Lorena Téllez, primeiro, e María Sancha, despois, encadearon sendos acertos na portería local para recuperar a renda, e unha nova parada francesa a Buforn desde os sete metros volvía actuar como punto de inflexión nun momento crucial.
Cifuentes rematou un novo ataque como un reloxo e, con esta facilidade, o Mecalia Atlético Guardés recuperaba unha vantaxe incontestable (18-24, min. 54), obrigando a Isma Martínez a solicitar un tempo morto para tratar de controlar os danos no BM Porriño.
Pouco máis houbo que facer o Guardés para levarse o derbi do balonmán feminino galego. Loitando ata o final, o obxectivo era un novo marcador holgado que permitise avanzar cara ao liderado.
Pero Palomino non baixou a garda e, xunto con algún que outro oco defensivo nos instantes finais, limitou o marcador final. Unha última parada de Amandine Balzinc, reflexo dun gran partido no que alcanzou as 18, foi a acción que pechou o tempo (21-25, final).
O Mecalia Atlético Guardés segue segundo, empatado a puntos cun Bera Bera, que gañou ao Elda con renda idéntica nesta xornada.
FICHA TÉCNICA
21) CONSERVAS ORBE ZENDAL BALONMÁN PORRIÑO (8+13): Katia Zhukova (2), Paulina Buforn (6), Ugazi Manterola, Carmen Prelchi, Lucía Laguna (6), Isa Ferrarin (p.) e Adriana Mallo (3) – sete inicial -. Tamén xogaron: Caro Bono, Juliana Santos, Alicia Campo, Iria Benaches, Julia Pestana, Viktoria Zsembery (3), Ana Belén Palomino (p.), Adriana Rial (1) e Isis Moreno.
25) MECALIA ATLÉTICO GUARDÉS (13+12): Amandine Balzinc (p.), Cecilia Cacheda (4), Lorena Téllez (8), María Palomo, Carme Castro (3), Blazka Hauptman e Ania Ramos – sete inicial -. Tamén xogaron: Sabina Mínguez (p.), Jazmín Mendoza, Rosane Serrano (2), Elena Martínez (3), Cristina Cifuentes, Ariana Portillo (2), María Sancha (3), Anouk Nieuwenweg e María Español.
MARCADOR CADA 5 MINUTOS: 3-3, 3-5, 6-6, 7-8, 8-9, 8-13 – descanso – 10-15, 12-17, 13-19, 17-21, 18-22 e 21-25.
EQUIPO ARBITRAL: Jorge Escudero e Jesús Escudero. Excluíron con dous minutos á local Adriana Mallo e á visitante Lorena Téllez (2) e amonestaron con tarxeta amarela á local Paulina Buforn e ás visitantes Blazka Hauptman e Lorena Téllez.
INCIDENCIAS: Partido correspondiente á novena xornada da Liga Guerreras Iberdrola 2025/2026, disputado no pavillón municipal de O Porriño. Antes do partido, un grupo de gaitas local interpretou o Himno de Galicia e entregouse o premio á Guerrera Iberdrola da sétima xornada a Carolina Bono.
