Desde O Porriño até Telde. Catro anos. Esa é a distancia quilométrica e temporal que separará o partido de semifinais que o Atlético Guardés xogará hoxe sábado 22 de maio co último precedente. O equipo de José Ignacio Prades impúxose esta tarde no Pavillón Insular Rita Hernández ao Liberbank Gijón (30-24, 16-9 ao descanso) nun partido que se puxo favorable para as galegas xa no primeiro acto.
A actuación de Marisol Carratú baixo paus -soberbia cun 50% de efectividade en 30 minutos-, a sólida defensa guardesa e a solvencia de face a portaría cunha Paula Arcos brillante (9 goles) puxeron en bandexa unha clasifica-ción que serve para empezar a pechar a ferida que o Guardés ten co torneo copeiro. O equipo do Baixo Miño ten mañá unha nova oportunidade para volver superarse a si mesmo e alcanzar por primeira vez a tan desexada final copeira.
#CopaReina2021 🏆 | 1/4 de final
💚 MVP @PaulaArcos10 💚 con ⭐️ 9 goles ⭐️
¡ENHORABUENA!
© RFEBM pic.twitter.com/mUeUA8rMiw
— Club Bm. Atl. Guardés (@Atlguardes_ofic) May 21, 2021
O destino quixo ao menos que as de Prades non volvan cruzar no segundo banzo da fase final co Super Amara Bera Bera, o seu particular ogro, e que se medirá esta vez ao Elche. Ambos os conxuntos gañaron ao Rincón Fertilidad Málaga e ao KH-7 Bm. Granollers, respectivamente.
Non era tarde para sorpresas. Así que o Guardés saíu de inicio co seu sete de gala: Patrícia Lima á man, Paula Arcos e Paulina Buforn reforzando os laterais, Lorena Pérez e Rosario Urban nos extremos, Sarah Valero como dona do seis metros e Marisol Carratú como gardiá da portaría. Para a defensa, o muro de Descalzo, contundente un día máis. E chas. Nun dicir amén, minuto 5 e 4-0 favorable para o Guardés.
Todo iso con algunha parada de Carratú, que xa empezaba a entoarse, outra de Raquel Álvarez, e varias faltas en ataque de Lima. Até o minuto 6 non se estrearon as asturianas con gol de María Palomo. E é que sen a central lalinense Cecilia Cacheda, o xogo do equipo adestrado por Cristina Cabeza pasou a depender esta tarde de Marizza Faria e Aida Palicio (10 goles).
Aos poucos foise metendo o Gijón no partido e do 4-0 pasouse ao 4-3. Foron minutos para o intercambio de goles e para que as porteiras collesen máis protagonismo. Houbo exclusión a Rosario Urban e en superioridade o equipo asturiano foi capaz de apertar (7-6, 8-7, 9-8?) e até aí duroulles a gasolina. Coincidindo coa exclusión de Torreira, empezaron as rotacións no banco guardés.
Sandra Santiago e Erika Rajnohová apareceron na primeira liña. Arcos, desde os 7m, puxo o 10-8. Parou Carratú e o Guardés pasou a apostar polo dobre pivote en ataque baixo a batuta de Lima con Gómez ancorada en seis metros e Sempere circulando para afundir á defensa. Santiago soltou un dos seus canonazos (11-8) e aínda que Natalia Martínez tentou eclipsarla, Carratú atallou o lanzamento.
💙 MA-RI-SOL CA-RRA-TÚ 💙 © RFEBM pic.twitter.com/HwcFkZuRKQ
— Club Bm. Atl. Guardés (@Atlguardes_ofic) May 21, 2021
De novo Santiago e co 12-8 o Guardés púñase de novo a +4 tras o parcial de inicio. Encendéronse as alarmas no banco xixonés e Cabeza pediu tempo morto. Urban, cunha execución preciosa e precisa puxo o 13-8 para chegar ao minuto 25. E mesmo en inferioridade pola exclusión de Carla Gómez, a defensa guardesa foi capaz de blocar o lanzamento e rival e ter ante si a primeira oportunidade do partido de porse seis arriba. Unha honra que tivo África Sempere (14-8).
A solidez defensiva do Guardés
O Gijón estaba ofuscado en ataque e perdía balóns á vez que a solidez era a característica principal do Guardés. Mover balón, mover balón e África Sempere agarraba en seis metros o pase de Marques que aínda que paraba a gardameta visitan-acabouche en 7m e sete arriba. O centro da defensa galega era impenetrable, igual que Carratú, e o Guardés quería máis.
Palicio tentaba pór orde no seu ataque, que só encontraba oco polos extremos… ata que Carratú pechábase no curto e seguía parando. Só Natalia Montilla foi capaz de pór fin a unha seca de dez minutos sen anotar e cun parcial de 6-0 local que deixaba a eliminatoria moi avanzada para o Guardés.
Aínda houbo tempo para que Prades dese unhas indicacións finais ás súas xogadoras e Lima puxese o 16-9 que pecharía un primeiro acto marcado pola actuación de Carratú e da defensa e a claridade no ataque. O Gijón, cun rexistro de 1 gol en 15 minutos, íase desesperado ao descanso.
O Guardés regresaba de vestiarios convencido da súa proposta de xogo. Ante a exguardesa Meriem Ezbida, Arcos anotaba para o 17-10. Carratú fixo outra das súas e Lorena Pérez elevaba a renda aos 8 goles, algo impensable ao comezo da eliminatoria. Pero o Gijón, campión de Copa en 2018 e rival do Guardés a última xornada ligueira, quería apurar as súas opcións até o final.
Algo teñen as Copas, que todo o mundo quéreas. O partido estaba en terreo Guardés, no terreo dun conxunto que ademais contou co empuxe dunha trintena de afeccionados nas bancadas o Pavillón Insular Rita Hernández. Pero chegaron uns minutos tolos. Palicio, fóra. Buforn, fóra, e en cinco minutos o Guardés só era capaz de anotar un gol.
💙 Catro anos despois… A SEMIFINAIS DE COPA! 💙
📸 © RFEBM pic.twitter.com/2H4y50IrOv
— Club Bm. Atl. Guardés (@Atlguardes_ofic) May 21, 2021
Prades pediu tempo morto no 41:22 co 19-14 no marcador e as súas xogadoras apertaron de novo. Sarah Valero, sensacional, puña o 20-14. O Gijón achegouse no 24-20 e o 25-22, pero esta vez o Guardés non quería deixar escapar un logro que se estivo traballando desde o minuto 0 de partido. Como se adoita dicir, Paula Arcos llo guisó… e ela soa comeuse un parcial de 3-0 que xa deixaba sentenciado un partido que acabou con 30-24.
Rita Hernández estalou de alegría, cun equipo feliz por regresar a unhas semifinais coperas catro anos despois e que tivo que facerse case unha sesión de fotos coas súas afeccionadas. Hoxe, sábado 22 de maio, o Atlético Guardés, volverá pelexar por unha praza nunha final que nunca ten conseguido alcanzar.
FICHA TÉCNICA
30) CLUB BM ATLÉTICO GUARDÉS (16+14): África Sempere (2), Sandra Santiago (4), Martina Mazza, Lorena Pérez (3), Estefanía Descalzo, Míriam Sempere, Paulina Pérez (2), Patrícia da Silva (2), Rosario Urban (2), Paula Arcos (9), Sarah Valero (4), Carla Gómez, Marisol Carratú, Erika Rajnohová (2), Laura Morais y Daniela Moreno.
24) LIBERBANK GIJÓN (9+15): Raquel Álvarez, Meriem Ezbida, Marta Méndez, Marizza Faria, María González (2), María Palomo (6), Debora Torreira (1), Nerea Calbón, Elisa Collado, Natalia Montilla (2), Aida Palicio (9), Natalia Martínez (1), Lucía Fernández, Sandra Vallina (3) y Lucía Alonso.
PARCIAIS CADA CINCO MINUTOS: 3-0, 4-2, 8-6, 10-8, 13-8, 16-9 -descanso-; 18-13, 19-13, 21-15, 22-18, 25-22, 30-24.
ÁRBITROS: Tania Rodríguez Estévez (Galicia) e Lorena García Gil (Aragón). Excluíro por parte do Guardés a Urban e Gómez (2) e por parte visitante a Deborah Torreira.
INCIDENCIAS: Partido correspondiente aos cuartos de final da XLII Fase final da Copa da Raíña celebrado no pavillón Insular Rita Hernández de Telde con público. Presencia duns 30 aficionados da Guarda.
#CopaReina2021 🏆 |
SEMIFINAIS | vs @BmAulaCultural
⌚️ 16:30h peninsular (15:30 insular)
A por un pasiño máis… ✨
Máis que nunca… #ÉUnSentimento 💙 © RFEBM pic.twitter.com/5ggy0aPEw1
— Club Bm. Atl. Guardés (@Atlguardes_ofic) May 22, 2021
