Tras o parón da competición e a anulación dos descensos na Primeira Nacional, o Atlético Arousana afrontará unha tempada máis na categoría de bronce do fútbol feminino. As de Vilagarcía levan varias semanas traballando de cara á vindeira tempada e esta semana pecharon as renovacións do dúo no corpo técnico conformado por Moncho e Nando e as xogadoras Carla Moital e Anita González.
A pesar de que os resultados non estaban a ser os deseados, o club quixo apostar polo dúo Moncho-Nando no banco debido ao gran traballo feito e a progresión que tivo o equipo desde a súa chegada. “Aínda que esta tempada a nivel resultados non foi boa, o gran traballo feito polo corpo técnico cun grupo novo fixo que sigamos confiando neles. O equipo tivo unha gran progresión desde a súa chegada e non tivemos dudas de que queriamos seguir con eles”, foron as palabras desde o club da renovación de ambos adestradores.
En canto ás xogadoras, as dúas primeiras en confirmar a súa renvoación con conxunto amarelo foron Carla Moital e Anita González. Dúas xogadoras que, a pesar da súa xuventude, demostraron un gran nivel e experiencia na Primeira Nacional.
Deste xeito anunciaba o club galego nas súas redes a permanencia de Anita no equipo: “RENOVACIÓNS: Ana Gonzalez “Anita” renova o seu compromiso para a tempada 20/21. Un pracer e orgullo terte no equipo”.
A xogadora mostrouse moi contenta e ilusionada de cara a vindeira tempada.
A segunda xogadora en confirmar a súa permanencia no Arousana por una ano máis foi Carla Moital que a través dun vídeo nas redes sociais do club anunciaba a súa renovación e ilusión por seguir ás órdes de Moncho e Nando: “RENOVACIONS: Carla Moital “Moi” anuncia que renovará o seu compromiso por unha tempada máis no noso club. Moi content@s de poder seguir contando con unha xogadora como ela. Desexámoslle moita sorte.
