O ano 2020 remata competitivamente para o Atlético Guardés cun triunfo colleitado diante do conxunto do Aula Alimentos Valladolid por 26-22 na Sangriña.
O partido do Atlético Guardés contra o Aula Alimentos Valladolid hai que pasalo a cámara rápida até o minuto 45:10. Un gol de Elena Cuadrado para o 21-20 deixaba paso a dous protagonistas: as porteiras locais Míriam Sempere e Marisol Carratú. A primeira, baixo paus toda a segunda parte, encadeaba accións de mérito ás que se sumaron dúas de 7m atallados pola gardameta arxentina e que desencadearon que o Aula Alimentos Valladolid se descolocase no partido con máis de dez minutos sen anotar.
O 24-20 a falta de máis de cinco minutos e medio para o final xa deixou unha renda insalvable para as de Peñas (26-22) que aínda que pelexaron até o final do partido acabaron sucumbindo a un Guardés que debe os dous puntos en boa medida ás súas porteiras.
Con este resultado, o Guardés colócase virtualmente como segundo clasificado dentro do Grupo A e tendo aínda pendente de xogar un partido aprazado contra o Rincón de la Fertilidad Málaga.
O cruce co Aula Alimentos Valladolid empezou morno, con moitas imprecisións para ambos os equipos. Cuadrado anotou o 0-1 e o Guardés aínda tardou 3 minutos en estrearse grazas a Lima (1-1). A igualdade aguantouse até o minuto 5, momento no que a aula empezou a apertar ao At. Guardés cun 6:0 impenetrable e Téllez por fin foi capaz de superar a Carratú baixo paus.
A defensa das de Peñas, Carmen Sanz baixo paus e a falta de atino local, levaban o marcador a un 4-6 que nada gustaba a Prades, quen pedía tempo morto.
A brecha aínda se faría máis grande, até o 5-8, pero aos poucos o Guardés, que se encomendou a Descalzo en seis metros e en xeral a calquera que conseguise coarse pola zona de pivote como Lorena Pérez e Carla Gómez, empezou a espertar cos mellores minutos de Arcos sobre a pista.
Aguantou un pouco máis o Aula Alimentos Valladolid, pero unha parada de Sempere a Tere Álvarez e de novo a conexión Arcos-Lima-Gómez funcionaba para igualar o partido (13-13) ata que Jimena Laguna , desde 7m, anotou (13-14). Arcos resolveu a primeira parte cun 14-14.
A principal novidade sobre a pista no segundo acto foi África Sempere. Houbo unha prematura exclusión a Arcos que sen intención deu un golpe na cara a Cuadrado e uns primeiros minutos marcados polos erros que lembraron ao comezo do partido.
O Aula afrouxa e o aproveitan as de Prades
Nesa maraña, o Guardés foi facéndose co partido e o Aula Alimentos Valladolid tivo que esperar até o 38 para anotar o seu primeiro gol da segunda parte. Houbo un 18-15 que xa parecía definitivo, pero un desfalecemento local deu ás visitantes e o partido, con moitas alternativas, aínda viviu un 19-19 que forzou o tempo morto de José Ignacio Prades.
Houbo un tímido intercambio de goles até o 21-20 e a emoción mantívose ata que Sempere e Carratú sentenciaron coas súas paradas o partido. Ás intervencións da alacantina sumáronse dúas 7m detidos pola arxentina e a aula dixo adeus ao partido.
Do 24-20 pasouse xa ao definitivo 26-22 que deixa alegría no Club Balonmán Atlético Guardés con dous puntos importantes para a segunda fase e unha vitoria para despedir o ano 2020.
FICHA TÉCNICA
CB ATLÉTICO GUARDÉS (14+12): África Sempere, Sandra Santiago, Lorena Pérez (2), Estefanía Descalzo (3), Miriam Sempere, Paulina Pérez (9), Patrícia Lima (6), Paula Arcos (4), Carla Gómez (2), Marisol Carratú, Erika Rajnohová e Daniela Moreno.
AULA ALIMENTOS VALLADOLID (14+8): Carmen Sanz, Elba Álvarez (3), Jimena Laguna (5), Claudia Álvarez, Ángela Nieto, Lulú Guerra, Cris Cifuentes (4), Lorena Téllez (4), Mireia Diez, Tere Álvarez (1), Sara Molés (), Yunis Camejo (), Elena Cuadrado (4), Rafaela Bergara e Amaia González de Garibay (1).
RESULTADO CADA 5 MIN.: 1-2,3-5, 4-6, 8-9, 11-12, 14-14 (descanso), 16-14, 18-16, 21-19, 21-20, 24-20, 26-22 (final).
ÁRBITROS: José C. Friera Cavada e Jesús Álvarez Menéndez (Asturias). Excluíron por parte do equipo local a Sandra Santiago, Descalzo, Lima, Arcos e Rajnohová, mentres que pola parte do conxunto visitante foi excluída Cuadrado (2).
INCIDENCIAS: Partido aprazado correspondente á quinta xornada da Liga Guerreras Iberdrola disputado na cancha guardesa da Sangriña a porta pechada. A cita contou coa visita do secretario xeral para o Deporte, José Ramón Lete Lasa. O partido estivo adicado á campaña ‘NON’ da Xunta de Galicia para concienciar contra a Violencia de Xénero.
