A perda de categoría do Dépor ABANCA prevía saídas de xogadoras importantes como Athenea del Castillo, e un par de semanas despois do descenso, confírmase a marcha da dianteira cántabra. A propia xogadora anunciou a súa saída cunha emotiva mensaxe en redes sociais, asegurando que “chegou o día que nunca quixen que chegara”.
Abegondo puido desfrutar do talento de Athenea nas dúas últimas campañas, nas que a futbolista se perfilou como unha das pezas de maior calidade no grupo adestrado por Manu Sánchez.
Con vistas ao seu futuro, o Real Madrid, que nas súas filas conta con exdeportivistas como Tere Abelleira ou Misa, estaría interesado en fichar á internacional absoluta e sub23, segundo informan varios medios.
A emotiva despedida de Athenea
“Despois de pensalo moito tiven que tomar esta difícil decisión. A xente que me coñece sabe o difícil que foi tomala e só espero que podades entenderme. Ás veces hai que tomar decisións para seguir medrando e iso conleva coller camiños diferentes, o que non quere dicir que esquezamos de onde vimos”, explica a futbolista.
Athenea subliña como vestiu desde o primeiro día a camiseta do Dépor ABANCA “con orgullo”, defendendo as cores branquiauzis “o mellor que puiden, deixándoo todo en cada partido e adestramento”.
COMUNICADO OFICIAL 💙🤍 pic.twitter.com/uGcvG7sfgW
— Athenea (@atheeneeaa_10) June 30, 2021
A futbolista recorda con cariño algúns dos seus fitos na Coruña, como “poder vestir a camiseta do RC Deportivo, ter a oportunidade de xogar en Riazor, defender as cores branquiazuis por toda España e poder debutar coa Selección Española absoluta. Todo iso conseguino aquí e grazas a vós”, recalca. “Síntome afortunada por todas as cousas que vivín na Coruña, cidade na que me sentín como en casa durante esta etapa da miña vida”, engade.
Athenea: “Síntome afortunada por todas as cousas que vivín na Coruña”
Na súa carta, Athenea agradeceu individualmente a axuda recibida por distintos membros do equipo, como Pablo Pereiro, o corpo técnico e as súas compañeiras, así como os empregados do club, os servizos médicos, a afección e á súa familia e amigos.
Athenea: “Sempre seredes a miña casa, VOLVEREI!”
Para finalizar a súa despedida, a dianteira afirmou que “desexo que o EQUIPO volva a estar onde merece. Sufrirei as vosas derrotas e alegrareime das vosas vitorias como unha Deportivista máis. Eu, desde a distancia, estarei pendente. Sempre seredes a miña casa, VOLVEREI!”.
Orgullosos de todo lo que hemos podido vivir juntos, siendo una de #asnosas 💙🤍💙 Moitas grazas e moita sorte @Atheeneeaa_10! https://t.co/T7B7WuwNQN
— RC Deportivo (@RCDeportivo) June 30, 2021
A traxectoria da internacional cántabra
Athenea deu as primeiras patadas ao balón no SD Reocín cántabro, co que seguiu medrando mentres o club convertíase no Real Racing Club de Santander, co que debutou na Segunda División.
Na tempada 2019/2020, a dianteira fichou polo Dépor ABANCA, na que sería a primeira campaña para club e xogadora na Primera Iberdrola. O seu debut foi o 8 de setembro do 2019, nun partido ante o RCD Espanyol.
Algo máis dun ano despois, un 23 de outubro do 2020, chegaría a súa estrea como internacional absoluta, no encontro ante a República Checa.
