O ano 2023 empeza para os cinco equipos da Primera División do FutSalFem da RFEF nesta tarde de sábado 7 de xaneiro onde se compite a 14ª xornada. Destaca o derbi da ría entre o Poio Pescamare o ENCE Marín Futsal (19:00 h), e tamén a visita do líder, Futsi Atlético Navalcarnero ao pavillón da Sagrada Familia na Coruña (18:00 h) ante o Viaxes Amarelle FSF. O Ourense Envialia visita ao CD Leganés (19:00 h), e o Pescados Rubén Burela FS viaxa a Gran Canaria para medirse ao Teldeportivo (18:00 horas).
Aínda que a táboa separa a estas alturas da competición a Poio Pescamar e ENCE Marín Futsal, nun derbi, aínda máis que en calquera outro partido, todo está por decidir ata que a bucina marque o final. O cruce, previsto para as 19:00 horas, terá como escenario a pista do Príncipe Felipe de Pontevedra.
O Poio Pescamar chega como terceiro clasificado desta Primera División do FutSalFem da RFEF. Moi forte e sen perderlles o pé a Futsi Atlético Navalcarnero (líder invicto) e ao Pescados Rubén Burela (segundo por ter mellor golaverage cas de Marín pero empatados a puntos). As conserveiras suman 36 puntos, gañaron 12 partidos e so perderon un. Suman 47 goles a favor e so 12 en contra. A súa serie é de 11 partidos seguidos gañando, será o derbi da ría o que poña fin a esa fantástica cifra do equipo que adestra Luis López-Tulla?
Pola súa parte, O ENCE Marín Futsal, que adestra Ramiro López, é undécimo con 14 puntos. Gañou catro encontros, empatou dous e perdeu sete. Atesora 30 goles a favor e 39 en contra. O conxunto branquiazul non poderá contar con Café por unha escordadura de nocello.
O líder invicto visita ao Viaxes Amarelle FSF na Coruña
En terras herculinas, o Viaxes Amarelle FSF empeza o ano 2023 recibindo a visita dun Futsi Atlético Navalcarnero que só coñece a vitoria. Trece partidos xogados e trece gañados para as madrileñas, líderes invictas da máxima categoría do futsalfem estatal.
O conxunto dirixido por Jorge Basanta regresa á competición despois do parón de Nadal. O reto é maiúsculo. Afrontará o seu primeiro partido do ano 2023 contra un rival que só coñece a vitoria en competición regular. As herculinas mediranse na tarde deste sábado 7 de xaneiro de 2023, a partir das 18:00 horas, no Pavillón Municipal de Sagrada Familia (A Coruña) recibindo ao Futsi Atlético Navalcarnero.
O técnico do club herculino, Jorge Basanta, convocou para este novo duelo na competición da regularidade, ás porteiras Leti Rojo e Nerea Ramallo, así como ás xogadoras de pista, Cris Lourés, Carol Agulla, Clàudia Lobo, Èlia Gullí, María Gómez, Lau Doce, Tety, Marta Hermo e Laura Rivas.
O rival que estará enfronte para o conxunto herculino, é un Futsi Atlético Navalcarnero que actualmente ocupa a primeira posición da xeral con 39 puntos, cultivados tras 13 vitorias, nos trece encontros que disputaron ata a data. As madrileñas suman 75 goles a favor, e encaixaron 12 tantos en contra. Estos números colócanas como o equipo máis anotador da competición e o equipo que menos goles encaixa.
O conxunto madrileño é un habitual da zona nobre nos últimos anos e o vixente campión de liga regular na tempada pasada; onde a súa última derrota en competición regular remóntase ao pasado mes de abril, en encontro correspondente á tempada 2021/2022; debido a que na presente tempada, contan todos os seus encontros por vitorias, e deixando en varias ocasións a súa portería a cero.
Os últimos enfrontamentos entre ambos os equipos, remóntanse á tempada 2020/2021 e onde as herculinas cederan derrotas en ambos os duelos, cun 6-2 en contra en casa das madrileñas e encaixando un doloroso 0-11 en terras herculinas.
O Viaxes Amarelle FSF tratará de sorprender a un rival moi complicado, que ocupa unha cómoda primeira posición, aínda que seguido moi de preto por outros dous equipos galegos, Pescados Rubén Burela FSF e Poio Pescamar FSF que se atopan, ambos, con tres puntos menos que as madrileñas.
O encontro será emitido por streaming a través da plataforma da Real Federación Española de Fútbol, e xestionado por ao Live Vuvuzela; podendo seguir en directo o encontro a través da seguinte ligazón:
O segundo visita ao penúltimo da 1ª Division futsalfem
Sobre o papel o cruce entre o Gran Canaria FSF Teldeportivo e o Pescados Rubén Burela FS é desigual. Enfróntanse o penúltimo clasificado da Primera División do FutSalFem e o segundo. Polos opostos da táboa.
Nesta volta tras a parada en Nadal do futsalfem, as Guerreiras Laranxas viaxan a Canarias coas pilas recargadas. Despois de dúas semanas de descanso coa familia, amigos e amigas o fútbol sala feminino volve esta fin de semana, na que o Pescados Rubén Burela FS terá que viaxar a Gran Canaria para xogar o partido da xornada 14 contra o Gran Canaria FSF Teldeportivo. O cruce está marcado para ás 18.00 hora peninsular (17:00 en Canarias), na Ciudad Deportiva.
Emilly Marcondes falaba así do encontro da 14 xornada contra o Teldedeportivo diante do que non se confían as galegas.
Ver esta publicación en Instagram
Igual que o resto de choques esta categoría, o partido será retransmitido en directo por Live Vuvuzela en streaming.
O Ourense Envialia visita La Fortuna
As xogadoras que adestra Raquel Mondoruza visitan ao CD Leganés esta tarde, desde as 19:00 horas, no pavillón da Fortuna. O Ourense Envialia trasládase a terras madrileñas tras gañar con rotundidade o pasado 4 de xaneiro ao Joventut D’Elx Clínica Basco Visitaelche (5-0).
As galegas ocupan a sexta praza da táboa na Primera División do futsalfem RFEF con sete partidos gañados, un empatado e cinco perdidos. Atesoran 41 goles a favor e 27 en contra. As súas rivais, o CD Leganés é 12º con catro partidos gañados, un empatado e oito perdidos. Anotou 32 goles e encaixou 51.
