A Federación Española de Baloncesto (FEB) pecha as inscripcións dos equipos que competirán nas súas seis categorías, e contará con sete clubs de Galicia nas competicións.
A Comisión Delegada do organismo deu o visto bo á composición de todas as ligas, que tiveron unha maior demanda de prazas das dispoñibles e acada unha cifra récord de equipos.
A LF Endesa
Na máxima categoría, Galicia contará con dous clubs representantes. O Durán Maquinaria Ensino e o BAXI Ferrol loitarán cos mellores equipos de España, dentro dun grupo de 16 clubs.
As lucenses xa saben o que é competir na primeira división. Na pasada tempada, o equipo do Ensino rematou na sétima posición, tras un curso complicado, no que tamén acadou a clasificación para a Copa da Raíña, na que caeron nos cuartos de final ante o Perfumerías Avenida.
O Ensino loita pero non pode cun intratable Perfumerías Avenida (82-51)
Pola súa parte, o BAXI Ferrol regresa á categoría de ouro, despois dunha tempada de 10. As ferrolás foron as líderes indiscutibles do grupo A da LF2 na campaña 2020/2021, facendo un pleno de vitorias.
As galegas deberán competir na primeira categoría da FEB, contra o Casademont Zaragoza, o Pajariel Bembibre PDM, Perfumerías Avenida, Ynsadiet Leganés, SPAR Girona, Cadí La Seu, Tenerife, Valencia BC, IDK Euskotren, Lointek Gernika Bizkaia, Kutxabank Araski, Campus Promete, Movistar Estudiantes e SPAR Gran Canaria.
A LF Challenge
Para a próxima campaña, a FEB creou unha nova categoría, entre a primeira e a segunda división, a LF Challenge, tamén con 16 equipos.
Nesta categoría, o Celta Zorka Recalvi será o representante galego. Na pasada campaña, as celestes competiron na LF2, con grandes resultados, acadando unha praza para loitar polo ascenso na segunda fase.
As viguesas deberán xogar contra o Quesos El Pastor, Azkoitia Azpeitia ISB, Osés Construcción Ardoi, Barça CBS, CAB Estepona, Advisoria Mataró Maresme, Lima Horta Barcelona, NB Paterna, Pacisa Alcobendas, Sinergia S. Real Canoe, Hozono Global Jairis, RACA Granada, Alter Enersun Al-Qázeres, Hierros Díaz Extremadura Miralvalle e C. Joventut Badalona.
A LF2 da FEB
Para esta vindeira tempada, a Liga Feminina 2 dividirase en dous grupos de 14 equipos, converténdose na base da pirámide do baloncesto feminino español.
No grupo A desta competición da FEB competirán catro clubs galegos: o CB Arxil, Mariscos Antón Cortegada, Maristas Coruña e Ulla Oil Rosalía.
Todos eles evitaron o descenso de categoría e seguirán na que agora é a terceira categoría competitiva. Neste grupo tamén estarán o BF León, GDKO Ibaizabal, Ausarta Barakaldo Est, Vega Lagunera Adareva Tenerife, Magec Tías Contra Violencia de Género, Aisa CB Alhaurín de la Torre, Córdoba Baloncesto Femenino, Ingenia Solar Energy C. Almería, Unicaja e Melilla Sport Capital La Salle.
O Arxil protesta a confección do grupo A da LF2
Ante a confección deste grupo A, o Arxil mostra o seu descontento debidos aos desprazamentos que deberán efectuar os clubs de Galicia.
Lino Vázquez declara que esta é “a peor confección das 21 edicións da LF2, xa que temos dúas viaxes longas a País Vasco, dúas ás illas, un a Melilla e catro a Andalucía”.
Segundo apuntan desde o club pontevedrés, “esta confección de grupo é unha ruina total para todos os equipos do grupo”.
Tal e como indican, serán o grupo da FEB con máis quilómetros da Liga feminina, sobre todo cunha gran diferenza respecto ao grupo B, no que “van e veñen no día”, mentres que as galegas e o resto de clubs do A terán que pasar varias noites fóra, “unha tolemia económica e de desgaste físico para os equipos do grupo A”.
