O presidente da Xunta de Galicia, Alberto Núñez Feijóo, anunciaba o luns 15 de febreiro que desde mañá, mércores 17 de febreiro, se levantaban algunhas das limitacións impostas ao deporte galego semanas atrás. O DOG aludía ás indicacións da Secretaría Xeral para o Deporte para unha mellor compresión e este organismo autonómico vén de facer pública unha ‘Guía simplificada das medidas preventivas para facer fronte ao risco de contaxio pola Covid-19 de aplicación ao Deporte Galego’.
Os cambios máis significativos, tal e como apuntaba o presidente Feijóo son que se poderán volver celebrar competicións deportivas en Galicia de ámbito autonómico e que se permite a reapertura de instalacións deportivas ao aire libre para a práctica do deporte individual.
Segue sen permitirse, por exemplo, a asistencia de público a “eventos, adestramentos e competicións deportivas de ámbito Estatal que se celebren en instalacións deportivas ou na vía pública”.
As medidas previstas nesta normativa terán efectos desde as 00.00 horas do día 17 de febreiro de 2021 e estenderán a súa eficacia ata as 00.00 horas do día 3 de marzo de 2021.
Na súa guía, a Secretaría Xeral para o Deporte refírese ao Decreto 26/2021, do 15 de febreiro, polo que se modifica o Decreto 8/2021, do 26 de xaneiro, polo que se adoptan medidas en Galicia para facer fronte á crise sanitaria, na condición de autoridade competente delegada do estado de alarma para conter a propagación de infeccións polo SARS-CoV-2; así como á Orde do 15 de febreiro de 2021 pola que se dispón a prórroga e a modificación das medidas de prevención específicas previstas na Orde do 26 de xaneiro de 2021, como consecuencia da evolución da situación epidemiolóxica derivada do COVID-19 en Galicia.
A guía da Secretaría Xeral para o Deporte distingue principalmente entre deporte federado e non federado.
Guía para o deporte non federado
Advirte que a práctica da actividade física ou deportiva so poderá realizarse ao aire libre ou en instalacións deportivas ao aire libre, de forma individual ou con persoas conviventes e coa utilización de máscara. Non se considera práctica individual a actividade física ou deportiva de 1×1 entre non conviventes.
Se fora preciso, as persoas con discapacidade poderán realizar a práctica con guía ou cunha persoa de apoio.
En todo caso, a práctica da actividade física ou deportiva realizarase respetando os límites perimetrais e de horario nocturno establecidos.
En tanto aos lugares para a práctica permítese a práctica da actividade física e deportiva non federada, de forma individual, en instalacións deportivas ao aire libre. O resto de instalacións deportivas, conforme ao disposto no artigo 4 da orde do 15 de febreiro de 2021, permanecerán pechadas.
Ao respecto doutros espazos, como os parques infantís, parques biosaudables, zonas deportivas, pistas skate ou espazos de uso público ao aire libre similares poderán estar abertos ao público sempre que neles se respecte unha capacidade máxima estimada dunha persoa por cada catro metros cadrados de espazo computable de superficie do recinto.
Nestes outros espazos a guía da Secretaría Xeral para o Deporte especifica que “deberán establecerse as medidas necesarias para procurar manter a distancia de seguridade interpersoal nas instalacións ou, na súa falta, a utilización de medidas alternativas de protección física. O uso de máscara será obrigatorio, aínda que se manteña a distancia de seguridade interpersoal indicada, nos termos previstos no número 1.3 do Acordo do Consello da Xunta, do 12 de xuño de 2020, na súa redacción vixente”.
Tamén advirte que deberán aplicarse “as medidas de hixiene e prevención establecidas, especialmente no que se refire a proceder diariamente á limpeza e desinfección destes espazos nas áreas de contacto das zonas comúns, tales como xogos das zonas infantís, aparellos de actividade física ou outro mobiliario urbano de uso compartido”.
E recoméndase “dispor neses espazos, especialmente no que se refire a parques infantís, de dispensadores de xeles hidroalcohólicos ou desinfectantes con actividade viricida, debidamente autorizados e rexistrados, ou dunha solución xabonosa no caso de espazos para menores de dous anos de idade.
Polo que atinxe ás restricións de mobilidade e de horario nocturno, en todo momento deberán de respetarse ás limitacións perimetrais e de horario nocturno establecidos.
Guía para o deporte federado estatal
Neste caso o documento publicado pola Secretaría Xeral para o Deporte distingue entre o Deporte Federado de nivel nacional e o de ámbito autonómico.
Con respecto ao estatal explica que as competicións deportivas federadas de nivel nacional e os seus adestramentos ·desenvolveranse de acordo co establecido pola administración competente e de conformidade coas limitacións establecidas nos protocolos federativos correspondentes·.
O Protocolo de referencia será o Protocolo de actuación para la vuelta de competiciones oficiales de ámbito estatal y carácter no profesional, aprobado polo Consejo Superior de Deportes, así como no seu caso o Protocolo reforzado que aprobe cada unha das Federacións Deportivas Españolas.
Mantense o control mediante test regulares para as modalidades deportivas que impliquen contacto. Que no caso dos e equipos ou deportistas galegos incluía realizar test serolóxicos ou probas similares cada 14 días naturais. E para equipos ou deportistas procedentes doutras comunidades autónomas que se despracen á Comunidade Autónoma de Galicia, obrigaba xa antes a realizar test serolóxicos ou probas similares en orixe polo menos entre 72 e 24 horas previas á celebración da competición, así como comunicar con idéntica antelación ás autoridades sanitarias autonómicas a relación das persoas integrantes da expedición trasladada a Galicia, segundo o formulario establecido. Tamén advirte a guía que no caso de desprazarse desde zonas de alta incidencia de COVID19 deberán ter en conta o sinalado no seguinte enlace.
Ao respecto das instalacións deportivas a guía indica que poderán permanecer abertas as instalacións deportivas nas que se celebren adestramentos ou competicións de ámbito federado nacional. Tamén os vestiarios e zonas de ducha: poderán ser usados cunha ocupación de ata o 30 % da capacidade máxima permitida, e procederase á limpeza e desinfección despois de cada uso e ao final da xornada
E polo que atinxe ás restricións de mobilidade e de horario nocturno se exceptúan das limitacións aqueles desprazamentos, adecuadamente xustificados, que se realicen en cumprimento de obrigas laborais e profesionais, así como para adestramentos ou competicións deportivas federadas.
Guía para o deporte federado autonómico
Tal e como explica a guía publicada pola Secretaría Xeral para o Deporte a práctica da actividade deportiva federada de ámbito autonómico, adestramentos e competicións, axustarase aos correspondentes protocolos Fisicovid-Dxtgalego aprobados. Do mesmo xeito que se viña facendo antes de que se restrinxise a súa práctica hai unhas semanas.
No que respecta ás instalacións deportivas, poderán permanecer abertas as instalacións deportivas en que se celebren adestramentos ou competicións de ámbito federado autonómico. Como acontecía no caso do deporte de ámbito estatal, vestiarios e zonas de ducha: poderán ser usados cunha ocupación de ata o 30 % da capacidade máxima permitida, e procederase á limpeza e desinfección despois de cada uso e ao final da xornada.
Exceptúanse das restricións de mobilidade e de horario nocturno aqueles desprazamentos, adecuadamente xustificados, que se realicen para adestramentos ou competicións de ámbito federado autonómico.
Que se consideran desprazamentos adecuadamente xustificados, quen pode desprazarse e cal é a documentación?
Especifica o documento da Secretaría Xeral para o Deporte que considerae adecuadamente xustificados os seguintes supostos:
- Que o desprazamento estea xustificado pola realización dun adestramento vinculado á participación nunha competición incluída no calendario oficial da correspondente federación deportiva ou pola participación nunha competición deste tipo. A estes efectos, como norma xeral, para esta excepción establécese un período previo de 4 semanas á celebración da competición.
- Que non existan alternativas de realización do adestramento e/ou da celebración da competición nun ámbito territorial que non exixa un desprazamento afectado polas limitacións á liberdade de circulación vixentes.
As persoas que poderán realizar neses supostos o desprazamento poderá ser:
- Deportista federada participante en competicións oficiais cun calendario aprobado para a tempada 2020/2021.
- No caso de acreditarse a súa necesidade, sparrings das persoas deportistas federadas de alto nivel, de alto rendemento deportivo ou incluídas en programas de tecnificación e rendemento deportivo, recoñecidas polo Consejo Superior de Deportes ou pola Secretaría Xeral para o Deporte ou órgano autonómico competente da Administración autonómica.
- Outro persoal autorizado (delegadas, etc.)
Por suposto, esta xustificación deberá estar acreditada e para iso a Secretaría Xeral para o deporte apunta que a persoa que se desprace xustificadamente deberá porte, durante o desprazamento, un certificado, segundo o modelo que facilita a propia administración autonómica, da correspondente federación ou club deportivo federado co seguinte contido mínimo:
- Identificación da persoa que se despraza e da súa participación nunha competición incluída no calendario oficial da correspondente federación deportiva.
- Lugar do adestramento xustificando a súa vinculación coa participación nunha competición incluída no calendario oficial da correspondente federación deportiva e/ou lugar da competición.
- Data e horario de realización do adestramento e/ou da celebración da competición.
- Xustificación da non existencia de alternativas de realización do adestramento e/ou da celebración da competición nun ámbito territorial que non exixa un desprazamento afectado polas limitacións á liberdade de circulación vixentes.
No caso de certificacións emitidas polos clubs, estes deberán comunicar á Federación respectiva un listado dos mesmos, a efectos do seguimento e verificación por parte destas.
As Federacións Deportivas Galegas remitirán semanalmente á Secretaría Xeral para o Deporte a información sobre os certificados emitidos, coa relación nominal dos deportistas e outros axentes autorizados.
