O Maristas Coruña impónse ao Arxil (60-47) e o Cortegada supera ao Robles Lleida (87-64) na oitava xornada da LF2

Xornada sen demasiadas sorpresas na Liga Feminina 2 (LF2). O Maristas Coruña, líder da competición, impúxose sen problemas ao C.B. Arxil (60-47), que suma a súa sexta derrota da tempada e continúa na parte de baixa da táboa. Pola súa banda, o Mariscos Antón Cortegada logrou vencer con soltura ao Robles Lleida (87-64) e sitúase na cuarta posición da clasificación.

O Maristas vence no duelo galego (60-47)

Tendo en conta que o Maristas Coruña ocupa a primeira posición da competición e que o C.B. Arxil non pasa polo seu mellor momento, a vitoria do conxunto herculino no duelo galego era a expectativa principal. Con todo, a diferenza final de 60-47 non reflicte totalmente a disparidade constatada entre ambos equipos no que vai de curso.

Ver esta publicación en Instagram

Una publicación compartida de Club Maristas Coruña (@clubmaristas)

As coruñesas impuxéronse con claridade nos dous primeiros cuartos, concluíndo con parciais de 19-9 e 20-12. Nos tramos finais, o encontro equilibrouse, con resultados de 15-17 no terceiro cuarto e 6-9 no último, amosando a resistencia do Arxil ante un rival superior.

Este resultado permite ao Maristas Coruña manter a súa posición de liderado na táboa con 15 puntos, mentres que o C.B. Arxil descende ao 12º posto e acumula 10 puntos.

O Maristas Coruña medirase ao Romakuruma U.E. Mataró o vindeiro día 29 de novembro, ás 16:00 horas no Pavelló d’Esports Josep Mora (Mataró).

O C.B. Arxil enfrontarase ao Mariscos Antón Cortegada o próximo día 29 de novembro, ás 19:30 horas no Pabellón del C.G.T.D. (Estadio de la Juventud) de Pontevedra.

FICHA TÉCNICA

PARCIAIS: 19-9, 20-12, 15-17, 6-9

EQUIPO ARBITRAL: Christian Abalo Buceta e Víctor González Wisniowski

INCIDENCIAS: Partido correspondente á oitava xornadada LF2, disputado no Maristas Col. (A Coruña).

Triunfo sólido do Cortegada (87-64)

O Mariscos Antón Cortegada non renuncia ao seu obxectivo de rematar a tempada no podio da clasificación. Ata o momento, suma seis vitorias e tan só dúas derrotas nos oito encontros disputados, acumulando un total de 14 puntos que sitúan ás vilagarcianas no cuarto posto da táboa.

Ver esta publicación en Instagram

Una publicación compartida de AD Cortegada (@adcortegada)

Na última xornada, impúxose con solvencia ao Robles Lleida por 87-64, un equipo que loita por manter a categoría e que, sobre o papel, semellaba accesible, pero que non estaba disposto a poñerlle as cousas fáciles ás galegas. O primeiro cuarto rematou 21-16 a favor do Cortegada, seguido dun segundo período que chegaba ao seu fin cun cómodo 24-11. Con todo, o terceiro cuarto foi para as visitantes, que o pecharon 16-23. Aínda así, o Cortegada soubo reaccionar e rematou o último tramo cun amplo 26-14.

Unha nova vitoria que achega ao conxunto dirixido por Manuel Santos Nores cada vez máis á cúpula da clasificación.

O seu próximo encontro será contra o C.B. Arxil o vindeiro día 11 de novembro, ás 19:30 horas no Pabellón del C.G.T.D. (Estadio de la Juventud) en Pontevedra.