Galicia formou parte, e moi ben representada, da final da Copa da Raíña de Fútbol. No encontro que enfrontou a FC Barcelona e EDF Logroño unha galega estivo á fronte do equipo arbitral: Zulema González.
Esta colexiada, vinculada ao fútbol desde os once anos, admite nun vídeo publicado pola Real Federación Española de Fútbol que arbitrar forma xa parte do seu estilo de vida.
Recordando os seus inicios, Zulema González admite que sempre se fixaba “nas de arriba”, así que o feito de que agora existan máis mulleres neste ámbito “da máis ganas e ves que podes chegar. Cantas máis sexamos, mellor”, declara a colexiada.
Para a árbitra ter a posibilidade de participar nesta final foi moi importante, pero non só no profesional. A galega perdeu á súa avoa por mor da COVID-19 recentemente e quixo adicarlle o seu traballo, xa que ela sempre a acompañaba aos campos de fútbol.
Zulema destaca o alto nivel do fútbol feminino
Segundo Zulema González, esta final de Copa foi unha mostra do alto nivel que hai no fútbol feminino español. “É importante que o fútbol sexa arbitrado por mulleres e que os partidos saian na tele. O fútbol feminino ven moi forte”, sinala.
Ademais, para a galega ter a oportunidade de arbitrar na final, rodeada dun gran equipo de compañeiras colexiadas “é unha satisfacción”.
Unha vez cumprida esta meta, a colexiada galega mantén a vista posta no futuro, pero centrándose no día a día, co mantra de “ser mellor árbitra cada día”.
