Non foi doado o último chanzo que tivo que subir o Viaxes Amarelle FSF para asinar o seu ascenso á Primeira División do futsalfem da RFEF. O conxunto La Boca Te Lía Futsal Alcantarilla foi un oso duro de roer. Chegaba a este partido decisivo o equipo laranxa unha tarxeta de presentación impecable. So un partido perdido, o último, se cadra un aviso de que non sempre se gaña e da importancia de chegar ao play-off cos cinco sentidos postos sobre a cancha.
Empezaron gañando as coruñesas pero as murcianas dérollen a volta ao marcador e o electrónico da Sagrada chegou a poñerse 1-2 ao cuarto de hora de xogo. Querían o equipo que dirixe Jorge Basanta finiquitar o ascenso nun partido. E non alongar así os pasos que as devolvesen á elite. E fixérono. Déronlle a volta ao marcador. Empataron primeiro e foron sumando goles despois ata o 4-2 definitivo. O regreso á máxima categoría das coruñesas é unha realidade.
O equipo herculino do Viaxes Amarelle FSF consegue así o ansiado ascenso á Primeira RFEF Futsal Feminina despois dun competido partido contra un LBTL Futsal Alcantarilla que se puxo por diante na primeira parte e fixo que as herculinas tivesen que aplicarse para conseguir un merecidísimo regreso á elite do futsal feminino estatal. Chega este premio logo dunha tempada de matrícula de honra e vencendo por un marcador de 4-2 ás súas últimas rivais, con goles de Candela Soria (2), Carlita e Patri Romaní.
Abre o marcador Candela Soria para o Amarelle
O partido empezaba cun Viaxes Amarelle FSF levando o peso do partido e a posesión do balón, mentres que o rival optaba por unha defensa a media pista e tratar de sorprender coa velocidade. Aos catro minutos de partido, Candela Soria nunha gran xogada persoal conseguía adiantar ás herculinas e subir o 1-0 ao marcador.
O LBTL Futsal Alcantarilla seguía cunha defensa intensa, e apoiábase cunha presión en media cancha para tentar crear perigo, e conseguía as súas primeiras chegadas; e de feito conseguía igualar a contenda tras unha xogada persoal de Marta de los Riscos por banda e tiro cruzado que levaba o 1-1 ao marcador.
A igualdade de novo no marcador, pero quedaba moito partido por diante; e o Viaxes Amarelle FSF chegaba en varias ocasións con perigo sobre a portería de Irene Franco, pero o gol resistíase para as galegas.
O Alcantarilla ponse por diante no electrónico na Sagrada
O conxunto herculino sabía do perigo a balón parado das visitantes, e estas conseguiron poñerse por diante no marcador a falta de catro minutos para o descanso cunha xogada a balón parado, que poñía o 1-2 no marcador; e poñía ao lado murciano o ascenso.
As herculinas que prepara Jorge Basanta seguían buscando o oco para conseguir a igualada, e nos últimos minutos, triste noticia para as galegas, que vían como Cris Lourés íase ao chan lesionada e non podía continuar o xogo. O último tramo do partido, foi unha zona intermedia de medo ao fallo, e o partido foise ao tempo de asueto con vantaxe visitante.
Logo do paso por vestiarios, o Viaxes Amarelle FSF empezaba o partido con máis confianza e buscando igualar a contenda canto antes; e ao minuto e medio de xogo, Carlita nun disparo exterior, á saída dun saque de esquina, conseguía devolver a igualada ao marcador.
Candela Soria asina tamén a remontada coruñesa
O gol deu ánimos ás galegas, que apenas un minuto máis tarde, cunha gran xogada persoal de Patri Romaní chegaba o 3-2, finalizado por Candela Soria encima da mesma liña de gol.
As herculinas conseguían dar a volta ao partido moi pronto, e as visitantes tiñan que buscar subir a liña de presión e tentar a igualada, pero as locais estaban moi centradas en defensa.
Os minutos pasaban, e as galegas estaban cómodas sobre a pista, pero con necesidade do gol que lles dese tranquilidade, pero este facíase de rogar.
Xa no tramo final, as murcianas de LBTL Futsal Alcantarilla optan por sacar o xogo de cinco para tentar igualar a contenda; pero o Viaxes Amarelle FSF aperta aínda máis alto para evitar que saquen o xogo de cinco; e María Gómez consegue roubar un balón en primeira liña, e cede o esférico a Patri Romaní que non perdoa e sobe o 4-2 ao luminoso, cando restaban pouco máis de dous minutos para o final.
As visitantes seguiron optando polo xogo de cinco para tratar de forzar a prórroga, pero un Viaxes Amarelle FSF moi serio en defensa mantivo a súa portería indemne para poder conseguir un merecidísimo ascenso tras unha tempada de luxo, e cun pavillón para rebentar de público.
Tempada de matrícula de honra o destas xogadoras e corpo técnico que o loitaron semana tras semana, para chegar a un play-off de ascenso onde houbo que sufrir e sufriuse para conseguir devolver o club á máxima categoría do fútbol sala feminino.
“Parece moi fácil, pero o traballo e o esforzo non se aprecia tanto, cando os resultados danse tan favorables, pero podemos asegurar que non hai ningunha que se quixese borrar de nin un só adestramento, sempre todas a unha, e a pesar dos días malos, sempre sumando en positivo para o obxectivo do club”, apuntan desde a entidade coruñesa poñendo en valor o esforzo feito por todo o bloque nesta tempada.
Tres play-offs en cinco anos e terceiro ascenso do Viaxes Amarelle FSF
Terceiro play-off de ascenso do conxunto herculino no últimos cinco anos e terceiro ascenso á Primeira RFEF Futsal Feminino. Desde o club coruñés apuntan, despois deste logro, á necesidade de contar con apoios. “Agora que o club demostrou con fartura que pode, tamén lle gustaría solicitar ás empresas da sociedade que apoien a este deporte, para que o proxecto deportivo con preto de 100 licenzas femininas desde benxamíns ata o primeiro equipo, siga representando á nosa cidade por todo o territorio nacional”, apuntan desde a entidade galega.
FICHA TÉCNICA:
4) VIAXES AMARELLE FSF: Leti Rojo, Cris Lourés, Yaiza, Laura Doce e Candela Soria – quinteto inicial -. Tamén xogaron: Patri Romaní, Èlia Gullí, María Gómez, Carol Agulla, Carlita, Irune Santesteban, Daryna Tkachenko e Sandra Rodríguez.
2) LA BOCA TE LÍA ALCANTARILLA: Irene Franco, Ana Belén, María Carmen, Marta de los Riscos e Aitana Olaso – quinteto inicial -. Tamén xogaron: Patricia Martínez, Claudia Navas, Blanca, Kichi, Olga Alcaraz, Iraia Romero, Tere Salmeron, Carla Ayensa e Vero Villa.
GOLES: 1-0 Candela Soria (min. 4); 1-1 Marta de los Riscos (min. 10); 1-2 Patricia Martínez (min. 16); 2-2 Carlita (min. 21); 3-2 Candela Soria (min. 24); 4-2 Patri Romaní (min. 38).
EQUIPO ARBITRAL: Marcos Noya Pardo e Francisco Javier Roldán Pérez do Comité Técnico de Árbitros de Santiago de Compostela e Pontevedra. Mesa: Santiago Modroño Liz do Comité Técnico de Árbitros da Coruña. Amosaron cartón amarelo ás futbolistas Marta de los Riscos e Kichi del La Boca Te Lía Futsal Alcantarilla.
INCIDENCIAS: Partido correspondente á primeira eliminatoria do play-off de ascenso á Primera División do fútbol sala feminino da RFEF disputado no pavillón municipal da Sagrada Familia, na Coruña.
