- As deportistas do BAXI Ferrol fixeron un percorrido polas instalacións e coñeceron en detalle os procesos de calidade, innovación e a historia da marca CLESA
As xogadoras do BAXI Ferrol visitaron esta mañá as instalacións de CLESA en Caldas de Reis para coñecer de primeira man todo o proceso de elaboración dos iogures da marca, dende a chegada do leite directamente das gandarías socias da Cooperativa Rural Galega CLUN ata a elaboración e o envasado do produto.
Durante a visita, as xogadoras fixeron un percorrido pola fábrica en funcionamento e mergulláronse nos procesos de calidade, innovación e sustentabilidade que caracterizan á marca.
No transcurso da xornada, a directora de Márketing e Comunicación de CLUN, Jessica Rey, encargouse tamén de explicarlles ás xogadoras a evolución da marca e o seu compromiso co territorio e o sector primario, valores que se estenden ao conxunto da cooperativa. Do mesmo xeito, destacou o apoio e compromiso de CLESA co deporte ao longo da historia e puxo en valor “a importancia de iniciativas que fomenten hábitos saudables” na sociedade.
Tamén participaron nunha cata de produtos dirixida por membros do equipo na que tiveron a oportunidade de degustar os últimos lanzamentos entre eles o Kéfir e os iogures gregos de CLESA.
Por último, as xogadoras fixeron entrega dunha camiseta do equipo asinada por cada unha delas como agradecemento polo apoio da marca ao deporte.
Unha colaboración histórica entre o BAXI e CLESA
A visita enmárcase no acordo de patrocinio entre CLESA e o BAXI Ferrol, co que se reforza a aposta da marca polo deporte feminino galego. O acordo dá continuidade ao apoio prestado ao conxunto ferrolán a pasada campaña, cando, tras realizar a mellor tempada da súa historia, alcanzou o subcampionato na Eurocup feminina. Logrou, así, converterse nun dos poucos equipos españois en colarse nunha final continental, e un dos pioneiros desta competición en chegar tan lonxe tras comezar a andadura dende a fase previa.
O equipo galego afronta este ano como unha clara revelación, pero coa confianza dun camiño marcado polos éxitos que lle permitiu sumar numerosos adeptos na cidade. Tanto é así que esta fin de semana sumou a undécima vitoria da tempada, deixando a permanencia practicamente amarrada nunha Liga Endesa cada vez máis igualada e competitiva.
Con esta colaboración, CLESA reafirma o seu compromiso co baloncesto ferrolán, xa que durante anos patrocinou tamén ao OAR Ferrol, club fundador da ACB, e que viviu os mellores capítulos da súa historia baixo este patrocinio. Todo un referente do baloncesto galego que durante moito tempo levou o nome de CLESA aló a onde ía.
Este patrocinio é un exemplo máis do compromiso de CLUN co deporte como ferramenta de cohesión social, promoción de hábitos saudables e visibilización do deporte feminino. Unha colaboración que, aseguraron, nace do compromiso, da superación e a paixón por seguir crecendo xuntos, dentro e fóra da pista.
