A Federación Galega de Hípica organiza xunto á Xunta de Galicia a segunda edición da Liga Territorial de Saltos Xacobeo Xogade. O torneo contará con varias sedes cos principais clubs de hípica das Rías Baixas e nel competirán dous centenares de nenos e nenas de todas as idades.
No acto de presentación da Liga Territorial de Saltos estivo presente o secretario xeral para o Deporte, José Ramón Lete Lasa, quen destacou a importancia dun deporte como a hípica para os máis pequenos, “non só pola educación recibida no coidado dos animais, senón tamén noutros moitos valores como a igualdade xa que a hípica é a única disciplina olímpica na que mulleres e homes compiten entre si sen distinción dos participantes polo seu sexo”.
Lete Lasa lembrou que a igualdade é, precisamente, un dos obxectivos primordiais do programa Xogade que leva a actividade a todos os concellos e brinda aos escolares a posibilidade de practicar e competir cos clubs e colexios de toda a comunidade.
Neste sentido, tal e como recolle a Xunta de Gaicia, o secretario destacou as súas categorías benxamín e alevín, nas que a maioría de equipos son mixtos, ou os Campionatos de España en Idade Escolar inclusivos. Un programa, dixo, que está a piques de recuperar as cifras prepandemia e que xa se achega aos 130.000 nenos e nenas inscritos.
As sedes da Liga de Saltos
Tras o éxito da Liga Territorial de Saltos 2021, a segunda edición incorpora novas sedes ata un total de seis. A primeira delas, xa realizada, foi no Club Hípico JC no Concello de Mos o pasado 9 de xaneiro.
As seguintes serán o vindeiro 27 de febreiro no CH Alazán en San Cosme (Vigo), o 13 de marzo no CH Equialia en Tui, o 10 de abril no CH Cemar en Mondariz, o 5 de xuño na Escola de Equitación La Muralla en Redondela e o 11 de setembro no Club Centro Ecuestre Atlántico en Santana (Pontecaldelas).
Segundo informa a Secretaría Xeral para o Deporte, as competicións desta Liga Territorial de Saltos van dende unha xincana con ponis para os máis pequenos, acompañados en todo momento dos seus profesores, ata probas nacionais con obstáculos de ata 120 e 130 centímetros para os máis maiores e experimentados.
