O ano olímpico non ten rematado todavía, e desde Galicia catro deportistas máis acudirán a Toquio para dalo todo nos Xogos Paralímpicos. Trátase das paralímpicas Adi Iglesias, Susana Rodríguez, Desirée Vila e María Victoria ‘Vicky’ Alonso.
A representación galega no equipo español contará con estas catro deportistas, tres delas atletas e unha baloncestista. Ademais, Susana Rodríguez fará historia competindo tamén no tríatlon ademais de nos 1.500 metros. Estes son os seus logros e os seus calendarios:
Adi Iglesias
A atleta de Mali Adi Iglesias, lucense de adopción, é unha das estrelas do atletismo a nivel internacional e unha aposta polo medalleiro olímpico.
A deportista do Lucus Caixa Rural, que acostuma a competir nos 100 e nos 200 metros, estará na cita olímpica correndo na primeira proba e na de 400.
Entre o seu palmarés de Adiaratu Iglesias Forneiro atópanse dúas pratas no Mundial Paralímpico de Dubai do 2019, dous ouros no mesmo ano no Campionato de España de persoas con discapacidade, outros dous no 2020 e campioa de Europa en 100 e 400 na edición do 2021, entre outros éxitos. Tamén é campioa galega absoluta nas súas modalidades desde o 2019.
Adi Iglesias, unha velocista galega coa mirada posta en Tokyo 2020
Calendario: Poderemos seguir a Adi Iglesias nas probas paralímpicas do 100m T13, que darán comezo o martes 31 de agosto ás 3:30 horas, e o 400m T13, que será o xoves 2 de setembro desde as 14:21 horas. De chegar á final do primeiro concurso, a galega competirá polas medallas no mesmo día. No segundo caso, a final será o sábado 4 de setembro.
Susana Rodríguez Gacio
Outra das estrelas galegas que estará nos Xogos Paralímpicos é Susana Rodríguez Gacio. A triatleta é unha habitual nos podios desta modalidade deportiva que combina natación, ciclismo e atletismo. Sen ir máis lonxe, neste mesmo 2021 Rodríguez fíxose co ouro na Copa do Mundo de Paratríatlon.
Susana Rodríguez álzase co ouro na Copa do Mundo de Paratríatlon
Desde que comezou a competir con 10 anos, a triatleta suma 27 vitorias en competicións internacionais, incluíndo tres campionatos do mundo.
Para a cita de Tokyo 2020, a galega supérase a si mesma e estará tamén presente nos 1.500 metros de atletismo, despois de conseguir a mínima no pasado mes de marzo. Con esta dobre competición, será a primeira española en estar en dúas probas paralímpicas distintas na mesma edición dos Xogos.
Susana Rodríguez Gacio acada a mínima para correr os 1.500 T11 dos Xogos Paralímpicos de Tokio
Fóra das pistas, Susana Rodríguez exerce como médico, e estivo en primeira liña durante a pandemia. O recoñecemento ao seu labor chegou ata a revista Time, que ocupou unha portada con ela.
Estes serán os seus segundos Xogos Paralímpicos, despois de conseguir o diploma en tríatlon en Río no 2016.
Calendario: A nosa paralímpica estará presente no tríatlon PTVI, que se celebra o sábado 28 de agosto desde as 01:31 horas. Tamén estará no 1.500 metros T11, competindo na eliminatoria o domingo, 29 de agosto, desde as 02:39 horas. A final desta proba será o luns 30.
Desirée Vila
Unha debutante nos Xogos Paralímpicos será a atleta de Gondomar Desirée Vila. A galega comezou no deporte na ximnasia acrobática, pero un accidente desembocou na amputación da súa perna.
O deporte non deixou a súa vida, e retomou a competición desta vez como atleta no salto de lonxitude e na velocidade nos 100 metros. No último ano, a galega conseguiu proclamarse campioa de España e gañar a súa primeira medalla nun europeo, obtendo ademais os récords nacionais nas dúas modalidades que practica.
Siguen los entrenamientos en el @CARSantCugat para @desivila98
🏃♀️🏃♀️
Muchas ilusiones puestas en el debut de la atleta en unos Juegos @Paralimpicos #atletismo #RoadToTokio #paralimpicos #Tokio2020 #MujeresEnElDeporte @Paralympics @ParaAthletics @deportegob @FMDDF @Fundacion_ONCE pic.twitter.com/J1AZULDBjR— FEDDF (@FEDEDDF) August 12, 2021
Calendario: A galega competirá o xoves 2 de setembro desde as 12:00 horas no salto de lonxitude T63.
No caso dos 100m o Estadio Olímpico acolle as series eliminatorias o sábado 4 de setembro con dúas quendas, unha ás 4:02 horas e outra ás 4:08 horas. A final está prevista para o mesmo sábado ás 14:26 horas.
María Victoria ‘Vicky’ Alonso
Por último, a representación das galegas paralímpicas péchase con María Victoria ‘Vicky’ Alonso. A viguesa forma parte da Selección Española feminina de baloncesto en cadeira de rodas que acudirá a Toquio.
Os inicios de Vicky no baloncesto comezaron na súa cidade natal, Vigo, xogando co Amfiv. Máis adiante mudouse a Ferrol para xogar co Basketmi, para rematar recalando no UCAM Murcia BSR, co que compite actualmente.
Estes serán os primeiros Xogos da pivote galega, pero a nosa paralímpica conta con experiencia en campionatos europeos e mundiais, alternando cuartas e quintas posicións e incluso un bronce e unha prata mundiais no 2005 e 2007 respectivamente.
Desde o 5 de agosto, Vicky e as súas compañeiras atópanse na concentración burbulla da Selección no CAR de Madrid.
Calendario: O primeiro partido de España será ante Estados Unidos, xogando o xoves 26 de agosto ás 10:00 horas. O segundo encontro terá como rival a China, o venres 27 desde as 10:00 horas.
O terceiro encontro da fase de grupos será o sábado 28, ás 04:15 horas ante Arxelia, rematando esta fase contra Países Baixos o domingo 29 ás 02:00 horas.
De pasar a cuartos, as españolas paralímpicas competirán o 31 de agosto. As semifinais están programadas para o 2 de setembro e a final para o 4, así como a loita polo bronce.
