Atletismo, baloncesto, judo, piragüismo ou skate son algunhas das disciplinas que contarán con olímpicas galegas nos Xogos Olímpicos de Toquio 2020.
Estas son as nosas deportistas olímpicas e os seus calendarios competitivos:
Atletismo: Ana Peleteiro e Belén Toimil
Nas probas de atletismo o deporte galego contará con dúas representantes: Ana Peleteiro e Belén Toimil competirán en triplo salto e lanzamento de peso respectivamente.
A primeira delas, plusmarquista española, conta entre os seus éxitos desta tempada o ouro no Campionato Absoluto de Pista Cuberta, prata no Europeo da mesma modalidade, segunda clasificada no Meeting Ibiza 2021 e proclamarse campioa no triplo salto do Campionato Absoluto ao Aire Libre. No último torneo que disputou, o Diamond League, a galega foi cuarta.
Para a mugardesa, o billete olímpico chegou cos 18.01 metros acadados no Campionato de Europa. Desde entón, Toimil seguiu sumando éxitos, cun quinto posto no Europeo de Nacións, o ouro na final polo título de División de Honor e outro primeiro posto no Campionato de España de atletismo ao aire libre, no cal estableceu un novo récord estatal.
Peleteiro e Toimil xa están oficialmente na Selección Española para Toquio 2021
Calendario: Ana Peleteiro competirá en triplo salto o venres 30 de xullo ás 12:05 horas na proba clasificatoria. De chegar á final, competirá o domingo 1 de agosto ás 13:20 horas.
Pola súa parte, Belén Toimil competirá en lanzamento de peso, o venres 30 de xullo ás 12:25 horas na proba clasificatoria. De pasar á final, competirá o domingo 1 de xullo ás 03:35 horas.
Baloncesto: Tamara Abalde e Raquel Carrera
En baloncesto, dúas galegas foron elixidas por Lucas Mondelo para ser olímpicas, entre as 12 xogadoras convocadas: Tamara Abalde e Raquel Carrera.
Abalde vén de fichar por un club galego, o Durán Maquinaria Ensino, e conta cunha ampla carreira como internacional, con preto de 60 participacións coa Selección Española e experiencia xa como olímpica, en Pekín 2008.
Pola súa parte, Carrera está a ser a xogadora revelación española. Durante esta tempada, a ourensá de 19 anos deulle a vitoria na EuroCup ao Valencia Basket, fixo historia na WNBA sendo a española cunha mellor posición no draft, foi MVP no seu segundo encontro como internacional e participou no EuroBasket.
Da convocatoria española caeuse a tamén galega Paula Ginzo, presente nas preparacións do EuroBasket e os Xogos Olímpicos.
Calendario: As dúas olímpicas galegas iniciarán a aventura olímpica o luns 26 de xullo ás 03:00 horas co partido ante Korea, dentro do Grupo A das clasificatorias.
O seguinte encontro será o xoves 29 de xullo ás 10:20 horas ante Serbia. O último partido clasificatorio será o domingo 1 de agosto ás 03:00 horas contra Canadá.
De pasar aos cuartos de final, competirán de novo o 4 de agosto. A semifinal feminina de baloncesto disputarase o 6 do memso mes, mentres que a loita polo bronce será o día 7 e a gran final o día 8, ás 04:30 horas.
Balonmán: Alicia Fernández
En balonmán, a olímpica galega será Alicia Fernández. A xogadora de Valdoviño leva sendo habitual nas convocatorias españolas desde o 2018, no clasificatorio para o Europeo, e repetindo desde entón nas listas de Carlos Viver.
Na clasificación para Toquio 2020, as Guerreras olímpicas acadaron o billete tras empatar ante Suecia por un 28-28 e vencer a Arxentina cun 31-16. Nestes partidos, Fernández anotou tres goles en cada encontro,
Entre os seus logros coa Selección, esta ter superado a cifra de 50 encontros coa camiseta vermella no pasado mes de abril, cando anotou 9 goles para o combinado das Guerreras.
Paula Arcos e Alicia Fernández entran na lista de convocadas para preparar Toquio 2021
Calendario: A xogadora Alicia Fernández terá o primeiro encontro destes Xogos Olímpicos o domingo, 25 de xullo, ás 12:30 horas ante Suecia, na rolda preliminar do Grupo B.
A seguinte cita, aínda na fase previa, será o martes, 27 de xullo, ás 14:30 horas ante Francia. O xoves 29 de xullo as españolas xogarán contra Brasil ás 04:00 horas. O vindeiro partido será ante Hungría, o sábado 31 de xullo ás 12:30 horas.
A rolda preliminar rematará para as olímpicas o luns 2 de agosto, ante o Comité Olímpico Ruso.
Os cuartos de final femininos disputaranse o mércores 4 de agosto. De pasar de fase, Alicia Fernández e o resto de olímpicas competirán na semifinal o venres 6 de agosto.
O duelo pola medalla de bronce, así como a gran final de balonmán, competiranse o domingo 8 de agosto.
Judo: María Bernabeu
María Bernabeu será a competidora española para os -70kg das probas de judo nestes Xogos Olímpicos. Porén, esta non será a primeira cita olímpica da judoka, quen estivo a punto de acadar o bronce en Río 2016.
A galega Sara Álvarez tamén aspiraba a estar na cita nipona, pero unha lesión truncou a súa oportunidade de ser olímpica.
Galicia terá catro judokas nos Xogos Olímpicos de Toquio 2021
Calendario: María Bernabeu terá o seu primeiro combate de Toquio o mércores 28 de xullo ás 04:00 horas, ante a rusa Madina Taimazova. Esta loita corresponde ás eliminatoria de dieciseisavos de final de -70kg. Os oitavos competiranse nese mesmo día.
O combate de repesca da categoría desta galega celebrarase tamén o 28 de xullo, desde as 10:00 horas. As loitas olímpicas polo bronce tamén terán lugar ese día, así como a final.
Skate: Julia Benedetti
A patinadora Julia Benedetti será a galega máis xove nesta edición dos Xogos. Con só 16 anos, esta coruñesa estreará o skate park como disciplina olímpica.
Actualmente, a rider ocupa a 13ª posición no ránking mundial, e ao longo de varios campionatos certificou a súa presenza entre as vinte deportistas que aspiran aos metais olímpicos.
No Dew Tour, última competición na que participou Benedetti, a galega quedou novena de entre as vinte participantes.
Julia Benedetti: “En Toquio vou tentar facelo o mellor posible e gozar da experiencia”
Calendario: Toda a modalidade de skatepark feminino, categoría na que compite Benedetti, celebrarase o mércores 4 de agosto. A eliminatoria previa da primeira serie comezará ás 02:00 horas, continuando coas seguintes series olímpicas ata as 04:06 horas.
A final disputarase ás 05:30 horas do 4 de agosto.
Piragüismo: Teresa Portela e Antía Jácome
No piragüismo, a galega Teresa Portela fará historia. É a primeira deportista española en acudir seis veces á cita olímpica. Despois de Sidney, Atenas, Pekín, Londres e Río, a padexeira estará tamén no K1 200 de Toquio.
Despois de máis de dúas décadas na elite, Portela segue ao máximo nivel. Desta vez, o billete olímpico chegou tras quedar primeira no selectivo de Pontevedra da súa modalidade, na que ela mesma clasificou á embarcación no 2019. Entre os seus logros esta tempada, engádese a cuarta posición no Mundial de Szeged.
Pola súa parte, Antía Jácome acadou o billete olímpico in extremis. A galega conseguira a praza para a embarcación C1 200 no Preolímpico, pero a madrileña María Corbera obtivera o pase á cita de Xapón.
Por este motivo, a Real Federación Española de Piragüismo tivo que organizar un espectacular desempate entre ambas padexeiras, que rematou con vitoria galega.
Jácome tamén aspiraba a estar en Toquio con outra Antía, Otero, pero a parella non logrou o pase no Preolímpico do C2 500.
Calendario: Estas dúas olímpicas galegas competirán no K1 200 e C1 200.
Teresa Portela faraino no primeiro. A primeiras series terán lugar o luns 2 de agosto desde as 02:30 ata as 02:58 horas. Os cuartos de final disputaranse ese mesmo día, desde as 04:45 horas.
Ao día seguinte, celebraranse as semifinais, desde as 02:30 horas, coa final B ás 04:30 horas e a final A, polas medallas, ás 04:37 horas.
Pola súa parte, Antía Jácome competirá no C1 200 desde as primeiras series o mércores 4 de agosto entre as 02:58 e as 03:12 horas. Os cuartos de final celebraranse no mesmo día, desde as 04:53 horas.
As semifinais olímpicas disputaranse o xoves, ás 02:44 e ás 02:51 horas. A final B terá lugar ás 04:36 horas e a final polas medallas ás 04:43 horas.
Vela: Támara Echegoyen
Por último, o equipo de olímpicas galegas péchase coa participación de Támara Echegoyen no 49er FX de vela. O fará da man de Paula Barceló, con quen é campioa do mundo da categoría.
Este mesmo ano, a galega foi homenaxeada polo Comité Olímpico Español, polo seu ouro acadado en Londres 2012.
Támara Echegoyen e Paula Barceló prepáranse para Tokio en Lanzarote
Calendario: A galega Támara Echegoyen competirá xunto a Paula Barceló no 49er FX. As tres primeiras regatas destas olímpicas terán lugar o martes 27 de xullo ás 05:05, 05:15 e 06:05 horas.
As carreiras cuarta, quinta e sexta celebraranse o mércores 28 de xullo desde as 07:50 horas. O venres 30 de xullo disputaranse as regatas sétima, oitava e novena, no mesmo horario.
A décima, undécima e duodécima regata terán lugar o sábado 31 de xullo desde as 05:05 horas. A regata final, na loita polas medallas olímpicas, disputarase o luns 2 de agosto ás 07:33 horas.
