Se o ano pasado case todo viña de cara, este ano, todo selle torce ao Dépor ABANCA. Un día si e outro tamén, teñen que loitar contra vento e marea para sacar adiante partidos nos que merecerían vencer sen tantísimo sufrimento. Hoxe, en Abegondo, As Nosas deportivistas tiveron que deixarse outra vez máis todo no tepe para vencer. Pero ese non é problema para un equipo que, como a canta a súa hinchada, nunca se rende.
Logo dun arranque de partido no que o Dépor ABANCA saiu con forza á procura da meta rival, as deportivistas recibiron un inxusto gol que as puña por detrás no marcador. Houbo que esperar á segunda metade para que chegase o gol de Peke que empatou o partido no minuto 53, e até o 78 non chegou o ansiado e traballado premio do gol do trunfo. Asinouno a capitá, Alba Merino, que xustamente nesta xornada festexaba o seu aniversario.
Así, Peke celebrou que xa é a cuarta centenaria deportivista e Alba Merino 32 xiros ao redor do sol e, seguramente, máis de media vida sobre os terreros de xogo. Vencer 2-1 ao RCD Espanyol é un resultado importante para as As Nosas coruñesas. Con esta vitoria, o equipo branquiazul suma 24 puntos e queda a cinco do Rayo Vallecano, que é o conxunto que marca arestora a permanencia. Sete partidos gañados con suor e lágrimas por un equipo que se resiste a baixar os brazos e que sabe que mentres hai vida, hai esperanza.
Entre os rivais directos, o Real Betis gañaba (1-2) cun gol decisivo da galega Mari Paz Vilas.
O Dépor saltou ao campo de Abegondo forte
No arranque do choque as deportivistas achegáronse con perigo á meta de Montse Quesada. A piques estivo de anotar Athenea del Castillo con so dous minutos de xogo. A súa volea foise lambendo a escuadra da portaría perica. Tamén tivo un disparo que se foi por riba do traveseiro Stephannie Blanco que botou moi ben unha falta a uns 35 metros da meta rival.
O gol do RCD Espanyol chegou nunha falta que lanzou Vanegas colando o esférico por toda a escuadra da meta defendida por Esther Sullastres que nada puido facer ante unha execución impecable.
Ir por detrás no marcador non ten sido un problema en partidos previos para o RC Deportivo ABANCA e tampouco pasou desta volta. Así que as futbolistas que adestra Manu Sánchez seguiron a teimar por ver porta. Peke, Athenea del Castillo, Cris e Eva Dios, protagonizaron xogadas de perigo ante a portaría defendida por Montse Quesada, pero sen éxito.
Preto do descanso, a cinco minutos de poñer rumbo a vestiarios, a fútbolista galega Anaïr Lomba, estivo por sorprender cun disparo que finalmente saíu polo lado esquerdo da meta defendida por Sullastres. Chegouse ao descanso coas catalás vencendo pola mínima e as galegas achuchando a Quesada sen parar.
No segundo período as deportivistas saíron enchufadas e as futbolistas do RCD Espanyol soubo axiña que habían ter que defender o seu resultado moito se querían levarse os tres puntos de Abegondo.
O gol da vitoria de As Nosas foi obra de Alba Merino a pase de Gaby
O Dépor ABANCA teimou e teimou, con corazón e cabeza nas súas accións de ataque até que, por fin, no minuto 53, chegaba o empate. A xogada xurde dunha recuperación de balón de Ainoa Campos que abre cara á banda dereita habilitando para Athenea del Castillo. O centro ao primeiro pau da cántabra atopou a cabeza de Pekegol que enviou o balón ao fondo das redes.
Volveu a crear unha boa ocasión a pontevedresa Anaïr Lomba, pero o remate da súa compañeira Laura Fernández petou na escuadra. Nin galegas, nin catalás daban o partido por sentenciado e querían desfacer as táboas que campeabam no marcador (1-1).
O tanto do trunfo de As Nosas deportivistas chegaría dunha falta que Stephannie Blanco colgou á área, Gaby mandoulla de cabeza á súa compañeira Alba Merino quen, tamén co atesta, rematou sen opcións para que Quesada poidese deter o coiro. O xúbilo estoupou nas filas deportivistas con ese 2-1 que significaba a remontada.
✨ Un gol de @albameri10 para seguir soñando con la permanencia
🔵 DEP 2-1 ESP 🌕
📺 A las 18:30h no te pierdas el @RayoFemenino 🆚 @RealSociedadFEM
#⃣ #FutFemEnGol pic.twitter.com/FkJv2zO8UL
— GOL ⚽ (@Gol) May 15, 2021
Quedaban aínda minutos por diante pero As Nosas deportivistas aferráronse á fe e a esperanza para defender con todo un resultado que as mantén vivas na loita por manter a categoría. Cinco puntos separan agora mesmo ás galegas do seu obxectivo.
O equipo descansa mañá, domingo 16 de maio e volverá ao traballo o luns 17 de maio pese a ser festivo co gallo do Día das Letras Galegas, xa que as coruñesas teñen partido o mércores 19 ás 18:00 horas na Ciudad Deportiva Wanda de Alcalá de Henares ante el Atlético de Madrid. Trátase do partido adiado da xornada 25 por mor de positivos por COVID-19 no conjunto colchonero. O partido poderá seguirse en directo a través da canle Vamos.
FICHA TÉCNICA
RC DEPORTIVO ABANCA: Esther Sullastres, Cris Martínez, Stephannie Blanco, Iris Arnaiz, Noelia Villegas, Eva Dios (Lady Andrade, min. 70), Alba Merino, Ainoa, Gaby, Peke (Helena Torres, min. 89) e Athenea del Castillo.
RCD ESPANYOL: Montse Quesada, Elba (Débora García, min. 68), Xènia, Vanegas, Sara Extremera, Anaïr, Letti (Modin, min. 75), Soldevila (Nicart, min. 75), Maya Yamamoto (Nora, min. 54), Baudet y Laura Fernández.
GOLES: 0-1 Vanegas (min. 20); 1-1 Peke (min. 53); 2-1 Alba Merino (min. 78).
ÁRBITRA: Rivera Olmedo (colexio vasco). Amosou cartón amarelo ás deportivista Athenea del Castillo (min. 50) e e Blanco (min. 90+2), así como ás futbolistas pericas: Nicart (min. 77) e Modin (min. 83)
INCIDENCIAS: Partido correspondente á 30ª xornada de Liga na Primera Iberdrola disputado na Cidade Deportiva de Abegondo con asistencia limitada a 150 espectadores debido á pandemia de COVID-19. Entregóuselle a Peke unha camisola co número 100 ás costas co gallo de que a futbolista xa ten sumados 100 partidos oficiais defendendo a elástica deportivista. Súmase así á As Nosas centenarias: Gaby (111), Cris (109), Iris (101) e, agora, Ainize Barea Peke (100).
