En menos dun mes, na primeira semana de xaneiro, este espazo para a visibilización do deporte feminino galego que é As Nosas cumprirá dous anos. O venres recibimos o noso primeiro recoñecemento público. A Federación Galega de Atletismo xunto coa Consellería de Cultura, Educación e Universidade, premiaba a nosa achega á sociedade en termos lingüísticos. No centenario do Atletismo Galego as persoas que conformamos o equipo de As Nosas recibimos con orgullo un premio “ao uso e fomento do galego no deporte”.
Silvia Cameán, directora do Medio Dixital As Nosas, recibe a distinción ao emprego da nosa Lingua Galega pic.twitter.com/XTGTmsTf0k
— Atletismo Galego (@atletismogalego) December 17, 2021
Desde o primeiro momento no que a dirección de Ártabra Comunicación pensou en poñer en marcha un medio dixital que visibilizase o papel da muller no deporte non houbo dúbida en que a lingua vehicular tiña que ser o galego.
Así, desde os eu nome “As Nosas“, fíxose unha aposta decidida por contar a actualidade deportiva en lingua galega. Sabiamos que a nosa fala, o noso idioma, tiña público. Hai moita xente que agradece poder contar con información deportiva en galego. Por suposto somos conscientes de que a elección do idioma pode afectar á dimensión da audiencia, incluso á indexación en buscadores, pero mantemos a nosa posta. Para nós é unha cuestión de coherencia e de compromiso.
En As Nosas empregamos un dominio .gal que tamén é unha elección consciente.
Así que aquí falamos de cambadelas, de maniotas, de adestramentos, de tempadas, de saques desde o curruncho, de vitorias, de finais, de partidos adiados e doutros gañados, falamos de lanzamentos de martelo ou de xavelina, de carreiras de remudas, de salto con pértega, de lonxitude e de triplo salto, de bater marcas, de probas, de loitas olímpicas, de balonmán, de escordaduras de nocello ou lesións no xeonllo. En definitiva, en As Nosas falamos galego.
E como quen ten boca, equivócase, pois seguramente teremos metido a zoca en máis dunha ocasión. Así que, vaian por diante as nosas desculpas á Real Academia Galega polas grallas que se poidan atopar neste ou noutros textos dos que conforman este xornal que, a diario desde hai dous anosn tenta sumar na normalización do uso do galego e na visibilización do papel da muller no deporte.
