Cando che contan que un proxecto como As Nosas vai nacer, e que vai ser comandado por persoas ás que lle presentas respecto e admiración, non cabe outra que estar ilusionad@ por formar parte do mesmo. Aínda coa incerteza que o reto leva aparellado.
Comezar de cero dá medo, pero non é tanto ao abrigo da xente que forma parte deste marabilloso proxecto. E refírome ás que están e ás que estiveron. Ás que están, pola súa loita incansable. Ás que estiveron, porque desde a distancia seguen facendo que esa loita mereza a pena.
Agora, un ano despois, dá vertixe mirar atrás e facer unha valoración de todo o que supón As Nosas. Non nos pidades ser moi obxectivos nisto, porque temos o noso corazonciño e resúltanos imposible aparcar os sentimentos.
As Nosas nace nun momento idóneo, pola necesidade de presentarlle ao mundo un proxecto deste calado. Por contribuír á visibilidade da muller no deporte e sobre todo, pola cantidade de historias que quedan por contar.
Sufrimos, e desgraciadamente así o estamos a facer aínda, toda unha pandemia mundial. E puidemos contalo. Moitísimas persoas non tiveron esa sorte e desde a nosa redacción, con motivo do noso aniversario, a nosa lembranza máis grande está con todas esas persoas que tiveron que pasar pola peor das situacións posibles: a marcha dun ser querido. Sairemos adiante.
Hoxe é un deses días nos que merece a pena facer o que fas. No que as verbas saen soas, e nos que hai luz. Pero para iso tivemos que atravesar moitos, moitos días de escuridade.
E sería imposible chegar ata aquí sen todas e cada unha das persoas que integran o noso equipo. Sería impensable sen todas as persoas que estades do outro lado, e ao noso carón, léndonos a diario e axudándonos a expandirnos nun contexto tan complexo.
Tamén sen vós, deportistas. Que formades parte dun eido tan bonito pero tan duro e cruel moitas das veces. Dun mundo no que unha derrota vale máis que mil triunfos.
A nosa vitoria de hoxe, a máis importante, é sen dúbida, poder seguir contando, informando, narrando. Poder berrar, ben alto un ano despois ao voso carón: AS NOSAS SOMOS NÓS.
