O Dépor ABANCA recibirá ao Sevilla FC no Estadio Municipal coruñés ABANCA-Riazor. Sería o segundo partido oficial, o primeiro de Liga, que As Nosas deportivistas xogarían na cancha por antonomasia do deportivismo.
O club anunciaba esta noticia antes de que as restricións sanitarias afectasen á cidade herculina. O cruce está marcado para o 8 de novembro ás 19:00 h., polo que, salvo que o peche perimetral da cidade persista, podería manterse a ubicación do partido.
Segundo explicaba o Real Club Deportivo a entidade coruñesas “fixou xa data, hora e lugar para o partido da 6ª xornada de Primeira Iberdrola que lle enfronta en casa ao Sevilla FC. Por primeira vez esta tempada, As Nosas xogarán como locais no Estadio ABANCA-Riazor, no que a pasada tempada tan só puideron disputar un partido de Copa da Raíña fronte á Valencia CF”.
Tal e como sinalaba o RCD, “as condicións de acceso ao Estadio quedan pendentes de fixar a próxima semana en función da situación epidemiolóxica e as medidas sanitaria”.
As Nosas deportivistas terán que agardar para xogar con público
Hoxe mesmo, o RC Deportivo tiña que recuar na súa iniciativa de abrir as portas a un cento de seareiras para o partido que o Dépor ABANCA vai xogar mañá sábado ás 13:00 horas na Cidade Deportiva de Abegondo contra o Santa Teresa estremeño.
